Վաղարշապատում արձանագրվել են վարչական ռեսուրսի չարաշահման դեպքեր, կա իրավապահների անհամաչափ գործողությունների վտանգ. Գ. Մելոյան

«Քաղաքացին պետք է գիտակցի ինքն է իր քվեի տերը։ Նա պետք է հասկանա, եթե չի գնում ընտրատեղամս, չի իրացնում իր քաղաքաղցիական պարտքը, ապա դա իր փոխարեն անում է այն ընտրողը, որը գնացել է ընտրատեղամաս»,-լրագրողների հետ հանդիպմանը հայտարարեց «Պառլամենտարիզմի զարգացման միջազգային կենտրոն» ՀԿ-ի ղեկավար Գոհար Մելոյանը՝ ընդգծելով, որ սա շատ կարևոր է հատկապես Երևանի ավագանու ընտրություններում մասնակցության աննախադեպ ցածր ցուցանիշով։

ՀԿ նախագահը նշում է, որ դա փաստում է կա վստահության պակաս ընտրական գործընթացի, քաղաքական ուժերի նկատմամբ։

«Գյումրին այլ պատկեր ցույց տվեց, կրկնակի շատ մարդ էր գնացել ընտրատեղամասեր, քան նախորդ ընտրություններին»,-ասաց Մելոյանը։

Նշենք, որ ՀԿ-ն  արտոնագրվել է իրականացնելու դիտորդական առաքելություն՝ Վաղարշապատ համայնքի ավագանու նոյեմբերի 16-ին կայանալիք համամասնական ընտրակարգով անցկացվող ընտրություններին։

Անդրադառնալով Վաղարշապատում այս ընթացքում գրանցված խախտումներին՝ Մելոյանը հիշեցրեց, կա հարուցված քրեական գործ բարեգործության փաստով, արձանագրվել են վարչական ռեսուրսի չարաշահումներ։

«Կա տեսանյութ, որտեղ հավաքի մասնակիցներից մեկը նշում է, որ ինքը գյուղապետարանի աշխատակից է, և իրեն հորդորել են մասնակցելու կոնկրետ թեկնածուի համար հրավիրված հավաքին։ Ունենք արձանագրված դեպք, երբ քաղաքապետարանի աշխատակիցները կոնկրետ թեկնածուի, պարզ է հա՞ որ թեկնածուի համար պաստառ են փակցնում։ Սա ևս կոպիտ խախտում է, քանի որ ակնհայտ կերպով կա վարչական ռեսուրսի չարաշահում»,-ասաց Մելոյանը։

ՀԿ նախագահը նշեց, որ ահազանգերը շատ են, դրանց մի մասի մասին չի ահազանգում, քանի որ դեռ փաստական հենք չունեն։

Հաշվի առնեով Գյումրիում այս տարվա մարտին տեղի ունեցած ՏԻՄ ընտրություններին նախորդող իրադարձություններն ու դեպքերը, դիտորդական առաքելություն իրականացնող կազմակերպության ղեկավարը որպես հնարավոր խնդիր մատնանշեց իրավապահների ոչ համաչափ գործողությունները։

«Կհիշեք, Գյումրիում ընդհուպ ընտրությունների նախորդ օրը բիրտ ձևով առանց օրինականության բերման էին ենթարկում թեկնածուի մերձավոր հարազատներին։ Դեպք ունեցանք, որ  ընտրական ցուցակի առաջին համար ծնողին, որդուն բերման ենթարկեցին, խուզարկություններ իրականացրեցին։ 2021-ի ընտրությունների ընթացքում էլ պարզ դարձավ քվեաթերթիկների գողացման դեպքերի մասին, երբ հանձնաժողովի անդամը քաղաքակն ուժի քվեաթերթիկը դրել էր մեկ այլ ուժի քվեաթերթիկների տրցակի վրա»,-ասաց բանախոսն ու կարևորեց ընտրական գործընթացի, ինստիտուտի կայացման գործում ՀԿ-ների, ԶԼՄ-ների աշխատանքը։

Մանրամասները՝ տեսանյութում։