Վաղարշապատում իշխանությունը վարչական ռեսուրս է օգտագործում․ Գրիշա Հարությունյան

«Հրապարակի» զրուցակիցը Վաղարշապատի ՏԻՄ ընտրություններում «Մայր Հայաստան» կուսակցության առաջին համար` համայնքապետի թեկնածու Գրիշա Հարությունյանն է:

-Ընտրություններին հաշված օրեր են մնացել: Ինչպե՞ս է ընթանում նախընտրական քարոզարշավը: Իշխանական թեկնածուն վարչական ռեսուրս է կիրառում, խոստումներ տալիս...

-Քարոզարշավը շատ նորմալ ընթանում է: Մարդկանց վերաբերմունքը մեր հանդեպ շատ դրական է: Ընտիր քարոզարշավ ունենք: Անկեղծ եմ ասում` այս օրերին գեթ մեկ մարդու չեմ հանդիպել, որ մեզ վատ վերաբերմունք ցույց տված լինի, արհամարհի կամ անտեսի: Բոլորն անխտիր դրական են վերաբերվում «Մայր Հայաստանին»: Շրջել ենք գյուղական համայնքներով, Էջմիածնի թաղամասերով, այժմ էլ շարունակվում է քարոզարշավը: Շրջում ենք տարբեր շենքերի բակերով, ծանոթանում ենք մարդկանց խնդիրներին: Մեր ծրագրերն ենք ներկայացնում, մարդիկ հավանություն են տալիս մեզ: Ընդգրկում ենք հարցեր, որոնք բարձրացնում է բնակչությունը: Խոյ համայնքի բնակիչները ջերմատների հետ կապված հարցեր են բարձրացնում, որոնք ներառել ենք մեր ծրագրերում….

-Ինչո՞ւ են դպրոցի տնօրեններ ազատվում աշխատանքից` ընդդիմության քարոզարշավներին մասնակցելու համար:

-Իշխանական թեկնածուներն օգտագործում են վարչական ռեսուրս, դա ակնհայտ է, բացարձակ ճշմարտություն է, բայց դրանով պետք է իրավապահ մարմինները զբաղվեն: Թե՛ գյուղական համայնքներում են վարչական ղեկավարներին գործի դրել, թե՛ Էջմիածին քաղաքում: Ասում են նաեւ, որ պետական աշխատողների են աշխատանքից հեռացնում, ուսուցիչների, տնօրենների, փոխտնօրենի եւ այլն:

-Ի՞նչ են անում վարչական ղեկավարները:

-Պաստառներ փակցնելուց սկսած, վարչական ռեսուրս են կիրառում: Ամեն հարցում:

-Ի՞նչ եք կարծում` կարո՞ղ եք 50+ հավաքել եւ հաղթանակ արձանագրել:

-Մենք լինելու ենք ընդդիմության համախմբողը, փորձելու ենք համագործակցել իրական ընդդիմության հետ, իսկ առհասարակ ես կարծում եմ, որ մենք հաղթելու ենք եւ նոյեմբերի 17-ից ունենալու ենք նոր Վաղարշապատ խոշորացված համայնք:

-Այսինքն` եթե 50+ չհավաքի որեւէ ընդդիմադիր ուժ, Գյումրիի օրինակով միավորվելու եք:

-Անկեղծ ասած, «եթե»-ն հարաբերական է ասված: Մենք պետք է ամեն ինչ անենք, որպեսզի 50+ ձայն հավաքենք, իսկ եթե Ձեր ասածի պես որեւէ ուժ չհավաքի այդքան ձայն, ապա իրական ընդդիմության հետ համագործակցելու ենք:

-Ի՞նչ ասել է՝ իրական ընդդիմություն: Ընդդիմության ոչ իրականը լինո՞ւմ է: Ո՞ր ուժն է կեղծ ընդդիմության տպավորություն թողնում:

-Դե, օրինակ, Արամ Սարգսյանի կուսակցությունը, մենք նրանց չենք համարում ընդդիմություն եւ որեւէ պարագայում այդ ուժի հետ չենք պատկերացնում համագործակցություն, այնպես, ինչպես ՔՊ-ի հետ, մեզ համար չկա տարբերություն այդ 2 կուսակցությունների միջեւ:

-Իրենք իրենց ընդդիմադիր չեն համարում, ուր մնաց դուք համարեք:

-Այո, ես էլ եմ այդ կարծիքին, իրենք էլ իրենց չեն համարում ընդդիմություն, հակառակ դեպքում նման քայլեր չէին անի:

-Ընդդիմադիր ուժերին ՔՊ-ն փորձում է կապել նախկին նախագահների, Դաշնակցության հետ: Ի՞նչ կասեք այս մասին:

-Մենք առանձին նոր ուժ ենք, ոչ մի կապ չունենք նախկին իշխանությունների եւ ներկա իշխանությունների հետ: Դրանք կեղծ տեղեկություններ են, իրականությունը խեղաթյուրող: