Կոմիտասի պողոտայում հրդեհաշիջման աշխատանքներին մասնակցում է 14 մարտական հաշվարկ. ՆԳՆ

Կոմիտասի պողոտայի առևտրի կենտրոններից մեկում տեղակայված սննդի կետում բռնկված հրդեհի շիջման աշխատանքներին այս պահին մասնակցում է 14 մարտական հաշվարկ։ Դեպքի վայրում գտնվող ՆԳՆ խոսնակը ԶԼՄ ներկայացուցիչներին հայտնեց, որ իրականացվել է տարհանում, այս պահին տուժածների մասին տեղեկատվություն չունեն։

Ծխահարված երկու փրկարարի առաջին բուժօգնություն է ցուցաբերվել։

Հարցին, թե տեղեկություններ կան, որ տարածքից մեկ անձ բերման է ենթքարկվել, Ն. Սարգսյանն ասաց՝ ինֆորմացիան ճշտելու կարիք ունի։

Հիշեցնենք, այսօր ժամը 11։08-ին Ճգնաժամային կառավարման ազգային կենտրոն ահազանգ է ստացվել, որ Երևան քաղաքի Կոմիտասի պողոտայի սննդի կետերից մեկում հրդեհ է բռնկվել։ Հրդեհի բարդության «1 ԲԻՍ» կանչով դեպքի վայր են մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատներից չորս մարտական հաշվարկ և մեկ ավտոսանդուղք։

Հայտարարվել է հրդեհի բարդության «Թիվ 3 կանչ»․ դեպքի վայր են մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատներից ևս տաս մարտական հաշվարկ, մեկ ավտոսանդուղք, ԵՓՎ, ՓՈՒՎ հրդեհաշիջման և փրկարարական աշխատանքների կազմակերպման բաժինների, Հոգեբանական աջակցության և Բժշկական ապահովման վարչության հերթապահ, Ճգնաժամային կառավարման ազգային կենտրոնի օպերատիվ և Փրկարարական ուժերի վարչության հատուկ նշանակության փրկարարական աշխատանքների իրականացման կենտրոնի փրկարարական խմբերը և գազածխապաշտպան ծառայության ավտոմեքենան։

Հրդեհը բռնկվել է շինության տանիքում։ Դեպքի վայրում աշխատանքները ղեկավարում է ՆԳՆ փրկարար ծառայության տնօրեն-ՆԳ նախարարի տեղակալ, փ/ծ գեներալ-մայոր, Կամո Ցուցուլյանը։

Մանրամասները՝ տեսանյութում։
Աղբյուրը`Panorama.am