Սերժ Սարգսյանի նկատմամբ բացակայելու արգելք խափանման միջոցը չկիրառվեց․ դատարանը մերժեց դատախազի միջնորդությունը

Հակակոռուպցիոն դատարանը՝ դատավոր Գիվի Հովհաննիսյանի նախագահությամբ, մերժել է ՀՀ երրորդ նախագահ Սերժ Սարգսյանի նկատմամբ բացակայելու արգելք խափանման միջոց կիրառելու մասին հանրային մեղադրողի միջնորդությունը։

«Փաստինֆո»-ի հաղորդմամբ՝ այսօր կայացած դատական նիստը նախապես հրավիրված չի եղել, այն հրավիրվել է հրատապության կարգով՝ հանրային մեղադրող Ծովակ Մնացականյանի միջնորդության հիման վրա՝ Սարգսյանի նկատմամբ որպես խափանման միջոց բացակայելու արգելք կիրառելու մասին։ Հրատապ նիստն անցավ դռնփակ ռեժիմով՝ պաշտպանի միջնորդության հիման վրա։ Մասնավորապես, դեռևս նախորդ նիստերին՝ խափանման միջոցը վերացնելու միջնորդության քննարկման ժամանակ պաշտպանության կողմը դիրքորոշում էր հայտնել՝ նշելով, որ խափանման միջոցը վերացնելու հիմնավորումները կապված էին վարույթի մասնակցի մասնավոր կյանքի հետ, հետևաբար նույն դիրքորոշումն ունեն նաև այժմ։

Նշենք, որ դատախազությունը հայտնել է, թե օպերատիվ տվյալներ ունեն Սարգսյանի՝ Հայաստանը լքելու մասին, մինչդեռ, դեռևս նախորդ նիստերի ընթացքում, որտեղ քննարկման առարկա էր դարձվել Սարգսյանի նկատմամբ ընտրված խափանման միջոց բացակայելու արգելքը վերացնելու հարցը՝ պաշտպանության կողմը հայտնել էր Սարգսյանի՝ ՀՀ-ից դուրս գալու անհրաժեշտության մասին։

Հիշեցնենք, որ ըստ մեղադրական եզրակացության՝ ՀՀ երրորդ նախագահ Սերժ Սարգսյանի կազմակերպմամբ և Ֆլեշ ՍՊ ընկերության սեփականատեր Բարսեղ Բեգլարյանի դրդմամբ, ՀՀ նախկին գյուղատնտեսության նախարարի տեղակալ Սամվել Գալստյանի ու նույն նախարարության բուսաբուծության վարչության պետ Գևորգ Հարությունյանի օժանդակությամբ, ՀՀ նախկին գյուղատնտեսության նախարար Սերգո Կարապետյանի կողմից 2013 թվականի հունվարի 25-ից փետրվարի 7-ն ընկած ժամանակահատվածում ՀՀ կառավարության պահուստային ֆոնդից վատնվել է պետական աջակցության ծրագրերի իրականացման ընթացքում իրացված 15.391.765 լիտր դիզելային վառելիքի համար հատկացված սուբսիդիայի առանձնապես խոշոր չափերով գումարը՝ 489.160.310 ՀՀ դրամը: Ինչ վերաբերում է Գիվի Հովհաննիսյանի վարույթում քննվող գործին, ապա այդ գործով, ըստ մեղադրանքի, Սերժ Սարգսյանը 2006-2015 թվականների ընթացքում «ԼԼ բիմբո» ՍՊ ընկերության հիմնադիր Սեդրակ Քոչարյանի, նույն ընկերության տնօրեն Ալեքսան Որսականյանի և իր հետ մտերիմ հարաբերությունների մեջ գտնվող Միխաիլ Բաղդասարովի կողմից միջոցներ տրամադրելու և խոչընդոտները վերացնելու եղանակներով դրսևորված օժանդակությամբ մասնակցել է Միխաիլ Բաղդասարովին պատկանող, այդ թվում՝ «Միկա Լիմիթեդ» և «Աբիտ» առևտրային կազմակերպությունների կառավարմանը՝ արտոնություններ, առավելություններ տրամադրելով նշված կազմակերպություններին և հովանավորելով իրականացվող գործունեությունը, որը դրսևորվել է օտարերկրյա ներդրումներով խոշոր տնտեսական ծրագրերում ներգրավելով, բարձր ռիսկայնության պայմաններում շուրջ 14 միլիոն ԱՄՆ դոլար վարկի տրամադրմամբ, օտարերկրյա կազմակերպությունների կողմից գույքի ձեռքբերման գործընթացներում ներգրավելով և այլն:

Բացի այդ, ըստ մեղադրանքի, Սերժ Սարգսյանը «ԼԼ բիմբո» ՍՊ ընկերության հիմնադիր Սեդրակ Քոչարյանի կողմից միջոցներ տրամադրելով և խոչընդոտներ վերացնելով դրսևորված օժանդակությամբ Միխաիլ Բաղդասարովի և նրա մասնակցությամբ առևտրային կազմակերպությունների օգտին իր լիազորությունների շրջանակում գործողություններ կատարելու, պաշտոնեական դիրքն օգտագործելով այդպիսի գործողությունների կատարմանը նպաստելու համար պահանջել և ստացել է առանձնապես խոշոր չափերով գույք՝ «Աբիտ» ՍՊ ընկերության 22,5 տոկոս բաժնեմասը, որը 2008 թվականի մարտի 23-ին ձևական գործարքով՝ 100.000 ՀՀ դրամով, վաճառվել է «ԼԼ բիմբո» ընկերությանը: