Ինչպես «Հետք»-ը հայտնվեց ՔՊ-ի ֆեյսբուքյան փակ խմբում․ լրագրողը ՔՊ փակ խմբից մանրամասներ է հայտնել. ԱԱԾ դիմակավորները կգնա՞ն Փաշինյանի հետևից

Էկոնոմիկայի նախարար Գևորգ Պապոյանի մատի մի շարժումով գործընկերս հայտնվեց «Քաղաքացիական պայմանագրի» ֆեյսբուքյան փակ խմբում։

«Հետք»-ի խմբագրությունում սկսվեց իրարանցում։ Բոլորս հավաքվեցինք էկրանի առաջ՝ տեսնելու, թե ինչ էր խոսվում իշխանության փակ խմբում։

Խումբն ունի 850-ից ավելի անդամ՝ վարչապետ Փաշինյանը, կուսակցության ղեկավարությունը, պատգամավորներ, նախարարներ ու ակտիվ կուսակցականներ։

Մինչ Գևորգ Պապոյանը ջնջում էր սխալմամբ ավելացրած մարդկանց՝ այդ թվում լրագրողներին, մենք հասցրինք ուսումնասիրել խումբը։

Խմբում քննարկվում են ամենատարբեր հարցեր՝ կուսակցության անդամավճարներ,
պետական համակարգում աշխատանքի հայտարարություններ՝ առաջին ձեռքից, ակտիվ տարածման ենթակա թեզեր ու գրառումներ, մի խոսքով՝ կուսակցության գործունեության վերաբերյալ ընթացիկ հարցեր։

2023 թվականի սեպտեմբերին ընթանում էր Երևանի ավագանու ընտրությունների քարոզարշավը։

Սեպտեմբերի 15-ին պետք է տեղի ունենային «Քաղաքացիական պայմանագրի» քարոզարշավն ամփոփող հանրահավաքը և երթը։ Հանրահավաքի բազմամարդությունն ապահովելու նպատակով վարչապետ Նիկոլ Փաշինյանը ֆեյսբուքյան փակ խմբում կատարել է այսպիսի գրառում.

«Հարգելի գործընկերներ, հույս ունեմ բոլորս հասկանում ենք Երևանի առաջիկա ընտրությունների հատուկ կարևորությունը։

Այս առումով խնդրում եմ բոլոր ջանքերը գործադրել վաղը, ժամը 18:00-ից, Էրեբունի թանգարանի հարակից հրապարակից նախատեսված մեր երթի բազմամարդությունն ու էներգետիկան ապահովելու համար։ Երթից հետո տեղի է ունենալու հանրահավաք, որը նույնքան կարևոր է։ Յուրաքանչյուրդ խնդրում եմ ներգրավվեք ձեր ընտանիքի անդամներին, ընկերներին, բարեկամներին, համախոհներին։

Վարչական ռեսուրսի կիրառումը բացառել։ Շնորհակալ եմ»։

Նիկոլ Փաշինյանի այս գրառման մեկնաբանություններում Կոտայքի փոխմարզպետ Հայկ Մկրտչյանը նշել էր, որ ինքը կապահովի 25-30 մարդու մասնակցություն։ Գավառի ավագանու ՔՊ խմբակցության անդամ Դավիթ Միրաբյանը գրել էր, որ համայնքի ՔՊ խմբակցությունը, իր ողջ ռեսուրսով, ներկա կլինի։ Նոյեմբերյանի ավագանու անդամներից Հայկանուշ Բեգլարյանը ևս նշել էր, որ ներկա են լինելու հավաքին։

Հարց է առաջանում, թե ինչու պիտի Երևանի ավագանու ընտրությունների քարոզարշավն ամփոփող հանրահավաքին մասնակցեին Գավառի կամ Նոյեմբերյանի ավագանու ՔՊ խմբակցության անդամները, և ովքեր են եղել Կոտայքի փոխմարզպետի կողմից հանրահավաքին բերվող 30 հոգին: