Ֆրանսիան նոր վարչապետ կունենա
Ֆրանսիայի նախագահ Էմանուել Մակրոնը 48 ժամվա ընթացքում կնշանակի նոր վարչապետ, — այս մասին հայտարարել է Ելիսեյան պալատը՝ հերքելով նոր ընտրություններ անցկացնելու մասին ենթադրությունները։
Ավելի վաղ Ֆրանսիայի նախկին վարչապետ Սեբաստիան Լեկորնուն հայտարարել էր, որ Ֆրանսիայի խորհրդարանի անդամների մեծամասնությունը չի ցանկանում վաղաժամկետ ընտրություններ և պատրաստ է փոխզիջումների գնալ, որոնք կարող են հանգեցնել կառավարության նոր ղեկավարի նշանակմանը «48 ժամվա ընթացքում»։ «Խորհրդարանում կա մեծամասնություն, և այս մեծամասնությունը ձգտում է խուսափել նոր ընտրություններից», — ասել է նա։
Ֆրանսիական հեռուստատեսությանը տված հարցազրույցում Լեկորնուն, որը երկուշաբթի օրը հանկարծակի հրաժարական է տվել պաշտոնավարելուց մեկ ամսից էլ քիչ ժամանակ անց, ասել է, որ մտադիր չէ մնալ վարչապետ, բայց կարծում է, որ իր ջանքերը հաջող են եղել։ Անցյալ տարվա ընտրություններից հետո ոչ մի կուսակցություն բացարձակ մեծամասնություն չի ստացել Ազգային ժողովում։ Սակայն «խորհրդարանում կա բացարձակ մեծամասնություն, և այս մեծամասնությունը դեմ է վաղաժամկետ ընտրություններին», — ասել է Լեկորնուն։
Հետևեք մեզ Facebook-ում