«Ազատման դիմում գրելը նորաձև է. «ՔՊ»-ում հերթական փլուզումն է սկսվել. Սոնա Աղեկյան

«ՔՊ»-ում հերթական փլուզումն է սկսվել և տարբեր պաշտոնյաներ իրար հետևից ազատման դիմումներ են գրում։ «Փաստինֆո»-ի հետ զրույցում նման կարծիք է հայտնել «Մայր Հայաստան» դաշինքի անդամ Սոնա Աղեկյանը։

Աղեկյանը մեզ հետ զրույցում նկատեց, ստի և մանիպուլիացիայի վրա կառուցված իշխանությունը չի կարող երկար գոյատևել։

«Պարզապես էլի մանիպուլիացիոն որոշ հնարքներով գոյատևում են, բայց մի նոր տենդենց նկատվում։ Կարելի է ասել, որ «ՔՊ»-ում նոր «մոդա» է սկսվել՝ ազատման դիմում նորաձև է դարձել և տարբեր պաշտոնյաներ փորձում են փրկվել խորտակվող նավից։ Սա նշանակում է, որ Նիկոլն անգամ իրեն ծառայություններ մատուցած մարդկանց չի կարողանում փրկել, էլ ուր մնաց՝ ՀՀ-ն կարողանա փրկել»,-ասաց նա։

Աղեկյանի կարծիքով՝ պաշտոնանկությունները շարունակական բնույթ են կրելու։

«Կարծում եմ, որ սա շարունակական բնույթ է կրելու։ Ճիշտ է, պաշտոնանկություններ, տեղափոխություններ նախկինում եւս եղել են, բայց հիմա պաշտոնանկությունները շատացել են է։ Երևի Աննայի «Կրթվելը նորաձև է» ակցիային զուգահեռ հեգնական իմաստով էլ ազատման դիմում գրելն է նորաձև դարձել, որովհետև հասկանում են, որ ամեն բան ձախողվել է։ Կարծում եմ, որ ազատման դիմում գրող մարդիկ փորձում են փրկվել այն ամենից, ինչը սպասվում է «ՔՊ»-ին ամբողջական իշխանափոխությունից հետո»,-նշեց Աղեկյանը։

Մեր զրուցակիցը չբացառեց, որ հնարավոր է լինեն նաև ճնշումների տակ գրված ազատման դիմումներ, քանի որ առջևում ընտրություններն են։

«Քանի որ առաջիկայում ընտրություններ պետք է լինեն հնարավոր է և չի բացառվում, որ մարդկանց վրա լինեն ճնշումներ կամ պարտադրանքներ, որ այսքան ձայն պետք է կարողանաք ապահովել, հակառակ դեպքում՝ ազատման դիմում գրեք, բայց դա հարցի մյուս կողմն է։ Երբ թիմի մեջ են, իրենք նախկինում պահելով իրենց պաշտոնները կարողացել են ապահովել այդ ամենը, փորձելով վերարտադրվել։ ինչո՞ւ հիմա չեն անում դա, որովհետև հասկանում են, որ այս համակարգն արդեն վերջնական ձախողվել ու մաշվել է և թելն արդեն կտրվում է։ ԱՎելի շատ հակված եմ հավատալու, որ փլուզվում է «ՔՊ»-ն»,-եզրափակեց Աղեկյանը։