Չկա խաղաղություն․ Կա զինադադար՝ կախված մեկ մարդու ցանկությունից․ Ռոբերտ Քոչարյան

Նիկոլ Փաշինյանը այսօր խոսում է խաղաղության մասին, որը մեծապես կախված է մեկ մարդու տրամադրությունից։ Այս մասին այսօր՝ հոկտեմբերի 7-ին, մամուլի ասուլիսի ընթացքում հայտարարեց ՀՀ երկրորդ նախագահ Ռոբերտ Քոչարյանը՝ պատասխանելով այն հարցին, թե արդյոք այս պայմաններում նա հավատում է, որ խաղաղությունը հաստատված է և Ադրբեջանի ու Հայաստանի միջև այլևս պատերազմ չի լինելու։

«Ի՞նչ խաղաղության մասին է խոսում այսօր Նիկոլ Փաշինյանը։ Ինքը խոսում է խաղաղության մասին, որը մեծապես կախված է մեկ մարդու տրամադրությունից։ Ալիևի տրամդրությունից է կախված այդ խաղաղությունը, որովհետև այդ փաստաթղթերում և ընդհանրապես որևէ տեղ չկան որևէ երաշխիքներ, չկան երաշխավորներ, չկան մեխանիզմներ, թե խախտելու դեպքում ինչ է կատարվելու։ Ուրեմն ամբողջ այս հռչակված խաղաղությունը կախված է մեկ մարդու խղճից։ Այդ մարդը կարող է մի օր վատ երազ տեսնել, կարող է մի օր մեկ այլ բան կատարվի, կարող է մի օր մտածի՝ վերջը էս խառնաշփոթ աշխարհում կարելի է էս հարցը ևս լուծել՝ Զանգեզուրի հարցը։ 

Հիմա դուք կարող է հարց տաք՝ իսկ դո՞ւք ինչ եք առաջարկում։ Դա վերջին ամիսների տոպ հարցն է, հատկապես ընդդիմադիր գործիչների։ 

Մենք առաջարկում ենք խաղաղություն, որը կունենա վերահսկելու մեխանիզմներ։ Դեմ չենք խաղաղությանը, ոչ մեկ դեմ չի, բայց խաղաղություն, որը կունենա երաշխավորներ, որոնք պատասխանատվություն կկրեն, այդ պայմանագրերի կատարման ոչ թե վկան կլինեն, այլ պատասխանատվություն կկրեն։ Միացյալ նահանգների կողմից որևէ երաշխիք այստեղ չկա։ Դրա համար ուղղակի սա մի հնարք է հերթական անգամ մարդկանց խաբելու։ 

Անգլիական մի ասացվածք կա՝ եթե մեկը քեզ խաբել է մեկ անգամ, ամոթ այդ մարդուն, եթե քեզ խաբեց երկրորդ անգամ, ամոթ քեզ։ Ես չգիտեմ, քանի՞ անգամ կարելի է խաբել հայ ժողովրդին։ Սա հերթական փորձն է։ Չկա խաղաղություն։ Կա զինադադար՝ կախված մեկ մարդու ցանկությունից»,- ասաց նա։

Մանրամասն՝ տեսանյութում։