«Փորձում է զրոյացնել այն պայքարը, որի համար արյուն ենք տվել». Զինվորականները կառավարությանն են վերադարձում իրենց մեդալներն ու շքանշանները

Կառավարության մոտ հավաքվել են մի խումբ զինվորականները՝ վերադարձելու իրենց մեդալներն ու շքանշանները՝ այդ կերպ ցույց տալով իրենց դժգոհությունը վարվող ապազգային և ապահայկական քաղաքականությանը։

Հովսեփ Ղազարյանն ասաց, որ այս կառավարությունն իր սխալները սրբագրելու, իր սխալները  չխոստովանելու  համար փորձում է խմբագրել մեր պատմությունը։

«Փորձում է  զրոյացնել այն պայքարը, որի համար արյուն ենք տվել։ Մեզ ասում է՝ մեր վերջին 30 տարվա պայքարը կեղծ է եղել, գոյություն չունի։ Ի նշան բողոքի այս խայտառակության դեմ՝ ես իմ մարտական ընկերների հետ որոշել ենք 44-օրյա պատերազմի ժամանակ ստացած շքանշանները հետ հանձնենք։

Մենք չենք կարող այս շքանշաններն այլևս կրել այն պարագայում, երբ ամեն արժեք, զոհողություն, որ դրված էր այս շքանշանների հիմքում, զրոյացվել են»,- ասաց Հ. Ղազարյանը՝ հստակեցնելով, որ պատերազմի 7 մասնակից այս պահին կառավարությանը կհանձնի իր շքանշանները։ 

Նա նշեց, որ իրենք շքանշանները ստացել են և Արցախի նախագահից, և Հայաստանի նախագահից. «Ես կհանձնեմ իմ «Մարտական խաչ» 2-րդ աստիճանի շքանշանը և «Մարտական ծառայություն» շքանշանը»։ 
«Այս իշխանավորները պայքարի գաղափարը ոչնչացնում են, զրոյացնում են, մենք այս քայլով բողոք ենք արտահայտում դրա դեմ, ասում են՝ մենք պայքարելու ենք։ Հաջորդիվ կիմանաք մեր մյուս քայրերի մասին»,- ասաց Հ.Ղազարյանը։ 
Աղբյուրը` Panorama.am