Փարաքարում սպանությունների համար ողջ քաղաքական պատասխանատվությունն ընկնում է իշխանությունների և անձամբ՝ Նիկոլ Փաշինյանի վրա

Այս գիշեր  սպանվել է Փարաքար համայնքի ղեկավար, «Միասնություն» ընդդիմադիր դաշինքից ընտրված Վոլոդյա Գրիգորյանը՝   Արմավիրի մարզում գտնվող իր տան մոտ։

Նրա հետ սպանվել է նաև Արարատի մարզի քրեական ոստիկանության աշխատակից Կարեն Աբրահամյանը, մեկ այլ վիրավոր՝ Արծրուն Գալստյանը տեղափոխվել է հիվանդանոց և վիրահատվել է:

Հիշեցնենք, որ սպանվել է մի մարդ, ով այս տարվա մարտի 30-ին մասնակցել էր Փարաքար համանքի ընտրություններին, ղեկավարել էր ընդդիմադիր «Միասնություն» դաշինքը և հաղթանակ էր տարել իշխանության թեկնածուի նկատմամբ:

Իշխանություններն այն ժամանակ ծանր էին տարել սույն պարտությունը, մանավանդ, որ միաժամանակ պարտվել էին նաև Գյումրիում:

Այս զուգահեռ գործընթացները  ցնցել էին, այն ժամանակ իշխանական բուրգը:

Եվ զարմանալի չէր, որ դրանից հետո իշխանությունը, չունենալով քաղաքական լուրջ այլընտրանքային գործիքակազմ, սկսեց իր ռեպրեսիվ գործողությունները ընդդիմության նկատմամբ:

Մեկ ամիս անց, մայիսի 6-ին այրվեց «Մայր Հայաստան»-ի անդամ Գևորգ Ստեփանյանի կնոջը պատկանող մեքենան՝ հենց իրենց տան մոտ: Ակնհայտ էր, որ դա կազմակերպված էր իշխանությունների կողմից, քանի որ մինչ այսօր այդ հանցագործության  կազմակերպիչը չի բացահայտվել:

Հետո, մայիսի վերջից սկսվեց գրոհը Հայ առաքելական եկեղեցու դեմ:

Հունիսին արդեն անցան բացահայտ բռնաճնշումների: Սկզբում ձերբակալեցին հայտնի գործարար Սամվել Կարապետյանին, իսկ հետո՝ շինծու գործեր սարքեցին երկու սրբազանների դեմ:

Իշխանությունների նյարդերը այնքան էին լարված, որ Նիկոլ Փաշինյանն սկսել էր կասկածել նաև իր նեղ շրջապատին՝ իր հանդեպ հավատարմության մեջ: Նա հայտարարում էր, որ իշխանությունն ինքն է, և ով իր հետ համաձայն չէ, պիտի հեռանա իշխանությունից:

Բոլորի համար հասկանալի է, որ գալիք խորհրդարանական ընտրություններում Նիկոլ Փաշինյանը շանս չունի հաղթելու, քանզի հանրային կարծիքը իր նկատմամբ արմատական ձևով փոխվել է:

Դա հասկանում են նաև իր թիմակիցները:

Փաշինյանին մնում է մեկ տարբերակ.փորձել վախի մթնոլորտ սերմանել հանրության մեջ իշխանությունների նկատմամբ:

Ուշադրություն դարձնենք այն հանգամանքի վրա, որ Գրիգորյանի հետ սպանվել է նաև ոստիկանության ներկայացուցիչ: Իսկ այդ հանգամանքը խորը մտահոգություն է առաջացրել տեղի համայնքի բնակիչների շրջանում:

«Եթե  ընդդիմիդիրի հետ միասին, ոստիկանության ներկայացուցիչ են սպանում, այն էլ տան մոտ,  ապա դա վկայում է այն մասին, որ շարքային քաղաքացին առավել ևս  երաշխիք չի կարող ունենալ իր անվտանգության  պահպահման համար», - նշում են համայնքի բնակիչները:

Հասկանալի է, որ հենց այս խնդիրն է փորձում նաև լուծել իշխանությունը:

Ճիշտ է, Փաշինյանն դատապարտել է այս հանցագործությունը: Սակայն ի՞նչ պետք է նա աներ: Չդատապարտե՞ր, կամ արդարացնե՞ր այդ արարքը: Իհարկե՝ ոչ:

Վաղարշապատ համայնքի ընտրություններից առաջ, որն ի դեպ սահմանակից է Փարաքար համայնքին, Փաշինյանին շահավետ է նման տեսակետների տարածումը: Քանի որ դրանով վախի մթնոլորտը կարող է տարածվել նաև հարևան համայնքների վրա:

Այս տեսանկյունից բոլոր քաղաքական և հանրային գործիչների պարտքն է հրապարակավ դատապարտել այս  հանցագործությունը, իշխանությանը պատին դեմ տալ, որպեսզի այս հանցագործությունը բացահայտվի և թույլ չտալ, որ մարդկանց մոտ առաջ գա վախի մթնոլորտ:

Այդ մթնոլորտի հաստատումը մնացել է ներկայիս իշխանության միակ դաշնակիցը, քանզի առանց դրա նրանք այլևս ունակ չեն հաջողության հասնելու, թե՛ տեղի, և թե՛ հանրապետության մակարդակով:

Սա է իրականությունը:

Դավիթ Մկրտչյան
Zham.am