Ոսկին այսօր նոր համաշխարհային ռեկորդ սահմանեց. մեկ ունցիայի արժեքը գերազանցեց 3700 դոլարի սահմանը

2025 թվականի աշունը սկսվեց թանկարժեք մետաղների գների աճով. ոսկու գինը  սեպտեմբերի 1-ին բարձրացավ  մինչև 3,556 դոլար՝ մեկ տրոյական ունցիայի համար, իսկ արծաթի արժեքը հասավ 40,61 դոլարի, ինչը ամենաբարձր ցուցանիշն էր  2011 թվականի սեպտեմբերից ի վեր։

Փորձագետների կարծիքով,  ոսկու գինը բարձրացավ  այն սպասումների ֆոնին, որ ԱՄՆ-ի  Դաշնային Պահուստային Համակարգը (ԴՊՀ) սեպտեմբերին 20-ին կայանալիք նիստում պատրաստվում էր նվազեցնել  տոկոսադրույքը։ Դա  ​​հիմնական գործոնն էր, որը ակտիվություն էր  առաջացրել  թանկարժեք մետաղների գնորդների շրջանում։

Եվ ահա, այդ օրը եկավ և որոշումը կայացվեց, որի արդյունքում ոսկին թանկացավ:

Վերլուծաբանները նշում են, որ ոսկու նկատմամբ հետաքրքրությունը խթանվում է նաև   կենտրոնական բանկերի գնումներով և Դաշնային պահուստային համակարգի կողմից հետագա գործողությունների սպասումներով: CME FedWatch-ի տվյալներով՝ շուկաները կանխատեսում են 93% և 81% հավանականություն, որ հոկտեմբերին և դեկտեմբերին համապատասխանաբար կիրականացվեն ևս երկու 25 բազային կետով տոկոսադրույքի իջեցումներ: Ներդրողները ներկայումս կենտրոնացած են Դաշնային պահուստային համակարգի պաշտոնյաների առաջիկա ելույթների և հիմնական գների ինդեքսի (PCE) հրապարակման վրա:

Հիշեցնենք, որ ԱՄՆ նախագահը վաղուց էր պահանջում ԴՊՀ-ից տոկոսադրույքի իջեցում, որպեսզի խթանվի ամերիկյան տնտեսության զարգացումը:

Սակայն այդ կառույցի ղեկավարը դիմադրում էր, հիմնավորելով, որ այդ քայլը կխթանի նաև գնաճը:

Ըստ  ամերիկյան Սահմանադրության՝ ԱՄՆ-ի նախագահը  չի կարող պարտադրել իր որոշումները ԴՊՀ-ի ղեկավարին: Սակայն գալիք տարի այդ կառույցի ղեկավարի ժամկետն ավարտվում է, և այդ ժամանակ Թրամփը կարող է նշանակել իր մարդուն:

Հաշվի առնելով այս ամենը՝ փորձագետները կանխատեսում են, որ ԴՊՀ-ի տոկոսադրույքների իջեցումը հետագայում անխուսափելի գործընթաց է լինելու, և դրա արդյունքում ԱՄՆ-ում և ողջ աշխարհում ուժեղանալու են ինֆլյացիոն գործընթացները:

Եվ այդ համատեքստում կանխատեսվում է, որ գալիք տարի ոսկու մեկ ունցիայի արժեքը կարող է գերազանցել 4000 դոլարի սահմանը:

Ոսկու գնի աճի վրա կարող են ազդել նաև այլ գործոններ, օրինակ աշխարհաքաղաքական հնարավոր կտրուկ փոփոխությունները: Սակայն, փորձագետների կարծիքով, այդ փոփոխությունների ազդեցությունը ոսկու գնի վրա կրում է ավելի ածանցյալ բնույթ, քան՝ ամերիկյան ԴՊՀ-ի որոշումները:

Սա է իրականությունը:

Արտակ Հակոբյան
Zham.am