Շրջանառության մեջ եղած ցանկացած գաղափար նա փչացնում է, «Չորրորդ Հանրապետության» մասին խոսողները բոլորովին այլ տրամաբանություն էին առաջարկում. Քաղաքագետ

«Ադրբեջանը պահանջում է, որ Հայաստանի Սահմանադրությունում փոփոխություն տեղի ունենա, Հայաստանը բոլոր պահանջները կատարել է, նաև այդ պահանջը պետք է կատարի։ Այդ պահանջը կատարելու համար Փաշինյանը փորձում է ինչ-որ գաղափարախոսություն օգտագործել՝ ազգի ռեֆորմացիա, մտածողության փոփոխություն... Սա արվում է ընդամենը Ադրբեջանի պահանջը կատարելու համար»,-Panorama.am-ի հետ զրույցում ասաց քաղաքագետ Ստեփան Դանիելյանը՝ արձագանքելով ՔՊ 7-րդ համաժողովում Նիկոլ Փաշինյանի հնչեցրած ելույթում Չորրորդ Հանրապետության մասին անդրադարձին։

Հայաստանի վարչապետի պաշտոնը զբաղեցնողը կուսակցության համաժողովին հետևած ճեպազրույցում Չորրորդ Հանրապետության անհրաժեշտությունն այսպես բացատրեց. «Երրորդ հանրապետությունը մեր հանրապետությունն է, մեր ժառանգությունն է, ինքնության մի մասն է, բայց մենք նոր փուլ ենք թևակոխում։ Եթե նշելու լինենք մի քանի տարբերություն, այդ տարբերություններից թերևս առաջնայինը կուզեի նշել խաղաղությունը»։

Փաշինյանի հիշատակումները խաղաղության մասին Դանիելյանը պրոպագանդիստական հնարք է համարում. «Ոչ մի խաղաղություն չկա, ողջ աշխարհում ապակայունացում է տեղի ունենում, և խաղաղության մասին խոսելը լուրջ չէ այս պահին, քանի որ ճիշտ հակառակ կանխատեսումներ են արվում։ Խաղաղությունը կախված չէ Հայաստանի, նույնիսկ Ադրբեջանի դիրքավորումից։ Գլոբալ ապակայունացում է, այստեղ Ռուսաստանի խնդիր կա, Իրանի, Թուրքիայի»։

Խաղաղության մասին պնդումը հիմնավորելու համար Փաշինյանը նույն ելույթում ասաց՝ 1 տարի 7 ամսվա ընթացքում ադրբեջանական կրակոցից ոչ մի հայ զինվոր չի զոհվել, չի վիրավորվել։ Ի պատասխան Դանիելյանը հիշեցնում է՝ փոխարենն այս ընթացքում զիջումներ են արվել։

«Այդ ընթացքում Հայաստանը զիջումների գնում,  կարող է ոչ մի զինվոր չզոհվել, և դա անվանել խաղաղություն»,-ասաց նա։

Հիշեցնենք, որ 2020-ին Փաշինյանը գրառում էր կատարել ֆեյսբուքյան իր էջում՝ հայտարարելով, որ 2019-ին զոհերը պատմական նվազագույնի են հասել։ Դրան հաջորդեցին 2020-ի 44-օրյա պատերազմն աղետալի հետևանքներով, 2022-ին Հայաստանի վրա Ադրբեջանի հարձակումը, 2023-ին շրջափակված ու սովի մատնված Արցախի վրա հարձակումը, ինչը պատճառով բազմաթիվ մարդիկ զոհվեցին, վիրավորվեցին, Արցախն ամբողջությամբ հայաթափվեց։

«Սա ցույց է տալիս, որ այդ մարդը մանիպուլյացիաներ է անում, շեղում է մարդկանց ուշադրությունն իրականությունից։ Նա ոչինչ չի որոշում, նրանից կախված չէ, կլինի՞ խաղաղություն, թե՞ պատերազմ։ Կրկնում եմ, դրանք գլոբալ պրոցեսներ են, այդ մարդու խոսքերը 0 արժեք ունեն»,-ասաց Դանիելյանը։

Վերադառնալով Չորրորդ Հանրապետության գաղափարին, Ս. Դանիելյանը հիշեցրեց, այն նոր չէ, տարբեր մարդիկ տարբեր գաղափարներ են առաջ քաշել։

«Դրա մասին խոսում էր ժամանակին նախկին նախագահ Արմեն Սարգսյանը։ Այդ գաղափարը Փաշինյանինը չէ։ Ընդհանրապես, շրջանառության մեջ եղած ցանկացած գաղափար նա փչացնում է, Չորրորդ Հանրապետության մասին խոսողները բոլորովին այլ տրամաբանություն էին առաջարկում։ Ինքն ուղղակի ադրբեջանական պահանջների իրականացման համար այդ ձևակերպումը վերցրել է, ինչպես ամեն ինչ այդ ձևակերպումն էլ այլասերել է»,-ասաց Դանիելյանը։

Հիշեցնենք, որ 44-օրյա պատերազմից հետո հրապարակվեց ՀՀ նախկին նախագահ Արմեն Սարգսյանի հոդվածը, որը վերնագրված էր «Դեպի Չորրորդ Հանրապետություն»։

«Պատերազմի պատճառած համազգային ցնցումից ու պարտադիր անցումային փուլից հետո մենք պետք է ձեռնարկենք նոր պետության կառուցումը, որը պայմանականորեն այս հոդվածում անվանում ենք «Չորրորդ Հանրապետություն»»,-մասնավորապես նշել էր Ա. Սարգսյանը։