Եթե բայրաքթարը Արցախում լուծեց Կովկասի ապագան, ապա ռուսական անօդաչու սարքերը կարող են լուծել Եվրոպայի ապագան. Նշում են ամերիացիները

Միջազգային ռազմական փորձագետները մեկ անգամ չէ, որ նշել են, որ երկրորդ ղարաբաղյան պատերազմում, ադրբեջանական բանակը հաղթանակ տարավ նաև թուրքական բայրաքթարների օգնությամբ:

Իսկ պատերազմի արդյունքը կանխորոշեց նաև տարածաշրջանի ապագան, երբ այդ հաղթանակի արդյունքում Թուրքիան դարձավ տարածաշրջանի լեգիտիմ խաղացող:

Այն ժամանակ ռուսական փորձագետները հատուկ շեշտեցին, որ թուրքական բայրաքթարների կիրառումը, որպես էքսպերիմենտ փորձարկվեց դեռ Սիրիայում և ցույց տվեց իր էֆեկտիվությունը:

Սակայն ռուսական վերնախավում դա լուրջ ուշադրության չարժանացավ: Առավել ևս Հայաստանի ռազմաքաղաքական վերնախավը այդ մասին չէր մտածում, քանզի այն ժամանակ, Փաշինյանի գլխավոր խնդիրը ոչ այնքան Արցախի հարցի լուծումն էր, այլ՝ իր ներքին հակառակորդների դեմ պայքարը:

Եվ ահա, այսօրվա ամերիկյան շատ փորձագետներ արձանագրում են, որ ռուսների նախկին սխալները այսօր կրկնում է  ամերիկյան ռազմաքաղաքական վերնախավը: Ըստ ամերիկյան CNN-ի վերլուծաբաններ Հեյլի Բրիցկի, Իզաբել Խուրշուդյանի, Ռուսաստան-Ուկրաինա հակամարտությունը հզոր խթան է հաղորդել անօդաչու թռչող սարքերի տեխնոլոգիաների զարգացմանը:

Իսկ  Միացյալ Նահանգները, որն ունի աշխարհի ամենաառաջադեմ զինված ուժերը և պաշտպանական արդյունաբերություններից մեկը, հայտնվել է լուրջ խնդրի առջև։ Ամերիկացի զինվորների մեծ մասը չունի անօդաչու համակարգերի դեմ պայքարելու հմտություններ։ Միացյալ Նահանգները, չնայած հաջողության է հասել խոշոր, թանկարժեք զենքերի՝ կործանիչների, տանկերի, ճշգրիտ հրթիռների ստեղծման գործում, ապացուցել է, որ պատրաստ չէ արագորեն արտադրել մեծ ծավալի փոքր, էժան համակարգեր, ինչպիսիք են անօդաչու թռչող սարքերը։

Մինչդեռ, 1000 դոլարից պակաս արժողությամբ պայթուցիկ նյութերով լցված անօդաչու թռչող սարքը կարող է ոչնչացնել միլիոնավոր դոլարներ արժողությամբ տանկ։ Անցյալ ամիս Սպիտակ տուն կատարած այցի ժամանակ Զելենսկին նախագահ  Թրամփին առաջարկեց 50 միլիարդ դոլարի գործարք՝ անօդաչու թռչող սարքերի մատակարարման և համատեղ արտադրության համար։

Հուլիսին Գերմանիայի Վիսբադեն քաղաքի կոնֆերանսների կենտրոնում ուկրաինացի զինվորական պաշտոնյաները ՆԱՏՕ-ի պաշտոնյաների և պաշտպանական արդյունաբերության փորձագետների լեփ-լեցուն դահլիճին ներկայացրին դաշինքի կողմից անօդաչու թռչող սարքերի արտադրության մեջ ներդրումներ կատարելու անհրաժեշտության վերաբերյալ իրենց գնահատականը։

Այդ կոնֆերանսում ուկրաինացի զինվորականները նշում եին, որ թե ռուս և թե ուկրաինացի զինվորականների գործողություններում, այսօր առյուծի բաժին է կազմում հենց անօդաչու սարքերի կիրառումը:

Օրինակ, ըստ ուկրաինացի գեներալ-մայոր Վլադիմիր Գորբատյուկի, Կիևի հաջողության մոտ 80%-ը թիրախներին հարվածելու գործում ձեռք է բերվում անօդաչու թռչող սարքերի շնորհիվ։ Նույնը, ըստ նրա ռուսական կողմի համար է, նրանց հաջողությունների նույն 80%  հենց այդ սարքերի օգտագործման արդյունքում են լինում:

Ուկրաինացի զինվորականները այն վարկածն էին առաջ քաշում, որ ներկա դրությամբ աշխարհում երկու բանակ կա, որ տիրապետում է ժամանակակից պատերազմի կանոններին, և դրանք Ռուսաստանի և Ուկրիանայի բանակներն են:

Ըստ նրանց՝ այլ երկրների բանակները որակական մակարդակով հետ են մնացել իրենց զարգացմամբ վերը նշված երկրների բանակներից, քանի որ բանակի կայացումը հիմնականում լինում է հենց կենդանի պատերազմում:

Ուկրաինացի զինվորականների հետ համաձայն են, թե եվրոպացի, և թե ամերիկացի զինվորական ոլորտի փորձագետները, նշելով, որ օրինակ, ամերիկյան բանակը նոր-նոր է փորձում լուծել իր հետ մնալու հարցը:

Ճիշտ է, ուկրաինացի զինվորականների գլխավոր մեսիջը այն էր, որ առանց ուկրիանական բանակի աջակցության, Արևմուտքը կարող է կանգնել ռուսական լուրջ սպառնալիքի առջև, կրում էր քարոզչական բնույթ:

Սակայն, նշում են արևմտյան փորձագետները, ուկրաինացի զինվորականների այս նախազգուշացումները այն եզակիներից են, որոնք պարունակում են նաև ճշմարտություն:

Քանզի դիվանագիտական հարթակներում հաղթանակների գրավականը նաև պատերազմներում հաղթանակ տանելն է:

Դրա վառ օրինակը այսօր հայ հանրությունը տեսնում է հետպատերազմյան շրջանում:

Եվ չի բացառվում, որ մոտ ժամանակներս նման վիճակում հայտնվեն նաև եվրոպական քաղաքական վերնախավերը, որոնք ադեկվատ պատկերացումներ չունեն, թե ինչ վիճակում կարող են հայտնվել ոչ հեռու ապագայում:

Սա է իրականությունը:

Արտակ Հակոբյան
Zham.am