Ջեֆրի Սաքսը բացահայտել է Փաշինյանի ընկեր Մակրոնի կեղծավոր դեմքը

Հայտնի ամերիկացի տնտեսագետ,  Կոլումբիայի համալսարանի «Երկրի ինստիտուտի» տնօրեն,  Հարվարդի համալսարանի պրոֆեսոր և  Բեռնարդ Հարմսի մրցանակի դափնեկիր Ջեֆրի Սաքսը, օրեր առաջ Ուկրաինայի հարցով միջազգային քննարկումների ժամանակ, սենսացիոն բացահայտում է արել:

Ըստ նրա՝ ռուս-ուկրաինական կոնֆլիկտի սկսվելուց անմիջապես հետո, Մակրոնը իրեն՝ Սաքսին,  Պատվո լեգեոնի շքանշան շնորհելու ժամանակ, մասնավոր զրույցի ընթացքում  նշել էր, թե «...այդ հակամարտությունը  ՆԱՏՕ-ի մեղքն է եղել։ Ավելին, նշել էր, թե սույն փաստը իրեն շատ էր զայրացրել...»:

Սաքսը փաստացի բացահայտել է Մակրոնի կեղծավոր դեմքը, որ մասնավոր զրույցում խոստովանել էր դա, իսկ այսօր բոլոր հրապարակային ելույթներում դատափետում է Ռուսաստանին և ատամներով պաշտպանում է Զելենսկուն:

Սաքսի այս բացահայտումը սենսացիոն բնույթ ունի: Եվ, եթե  Սաքսի խոսքերը  Մակրոնը չհերքի, ապա դա կնշանակի, որ ներկայիս եվրոպական երկրների ղեկավարները կեղծավորներ են և պատերազմի մեղսակիցներ:

Քանզի մասնավոր զրույցներում մեկ բան են ասում, իսկ հրապարակայնորեն արտասանում են բոլորովին այլ բան:

Սաքսի այս խոստովանությանը արձագանքել էր նաև իտալացի պրոֆեսոր Ալեսանդրո Օրսինին, ով  նշել էր, թե իր շփումները այն ժամանակ արևմտյան լիդերների հետ, ցույց էին տվել, որ մինչ այս կոնֆլիկտը, նրանք համոզված են եղել, որ Պուտինը ռիսկ չի  անի  հարձակվել Ուկրաինայի վրա, քանի որ համոզված էին, որ ռուսական բանակը պատրաստ չէր նման քայլի:

Բացի այդ, սկսած 1991 թվականից, Ռուսաստանը Արևմուտքին միշտ զիջել է, գրեթե բոլոր փուլերում: Եվ նրանք, ըստ իտալացի պրոֆեսորի,  համոզված էին, որ Ուկրիանայի հարցում, ևս Պուտնիը պիտի զիջեր:

Սակայն, ըստ պրոֆեսորի, ներկայիս եվրոպական լիդերները գրեթե կասկած չունեն, որ ռուսական բանակը կարող է մեծ հաղթանակ տանել, սակայն ռիսկ չեն անում, հրապարակայնորեն խոստովանել դա:

Սաքսի և Օրսինիի այս բացահայտումները  ցույց են  տալիս, թե ինչ սրիկայության են ունակ ներկայիս եվրոպացի լիդերները:

Հատկապես դա պետք է հետաքրքրի նաև մեզ՝ հայերիս:

Քանզի Հայաստանի «բարեկամ»   համարվող Մակրոնը, սկսած 2020 թվականից, բոլոր փուլերում աջակցում  և խրախուսում էր Փաշինյանին՝ գնալ Ադրբեջանին արվող աննախադեպ զիջումների:

Մասնավորապես,  նա էր 2022-ի հոկտեմբերի 6-ի համաձայնության գլխավոր կնքահայրերից մեկը, որի արդյունքում Փաշինյանը վիժեցրեց նոյեմբերի 9-ի փաստաթուղթը և ճանաչեց Արցախը Ադրբեջանի մաս:

Մակրոնի համար գլխավորը ռուսներին հեռացնելն էր Արցախից և այդ պատճառով էլ նա  կողմ էր, որ   Արցախը ճանաչվի Ադրբեջանի մաս, և իմաստազրկվի ռուսական զորքերի հետագա ներկայությունն Արցախում:

Բնականաբար, նույն Մակրոնը մասնավոր զրույցներում Ֆրանսիայի հայերին կարող էր այլ խոստումներ տալ, նույնիսկ՝ բողոքել Փաշինյանից:

Սակայն Սաքսի այս վերջին բացահայտումից հետո պարզ է դառնում, թե քանի քաղաքական երես ունի Մակրոնը:

Ժամանակն է, որ դրա մասին իմանա նաև  հայ հանրությունը:

Բայց դրա համար նաև Հայաստանի քաղաքական վերնախավը պիտի պատրաստ լինի հանրությանը ներկայացնել այս ամենը:

Առանց ճշմարտության բացահայտման, հայ հանրությունը միշտ մնալու է անորոշ պատկերացումների մեջ:

Իսկ ընդդիմությունն էլ բողոքելու է, թե ինչու հանրությունը չի աջակցում իրեն՝ Փաշինյանին իշխանությունից հեռացնելու համար:

Այս փակ շղթան բացելու միակ միջոցը հանրության հետ անկեղծ խոսելն է:

Դրանից հետո միայն հանրությունը կկարողանա  ճիշտ գնահատել իրավիճակը, ճանաչել իր հակառակորդներին, կեղծ բարեկամներին  և իրական  դաշնակիցներին:

Եվ միայն դրանից հետո հանրությունը կհասկանա, թե ումով պիտի փոխել Փաշինյանին, որպեսզի երկիրը կարողանա դուրս գալ այս իրավիճակից:

Սա է իրականությունը:

Դավիթ Մկրտչյան
Zham.am