Հայաստան-Իռլանդիա 2-1. վերջապես հաղթանակ, տպավորիչ խաղ, համառ պայքար

Հայաստանի ազգային հավաքականն ԱԱ-2026-ի եվրոպական ընտրական մրցաշարի F խմբի երկրորդ տուրում Երևանի Վազգեն Սարգսյանի անվան «Հանրապետական» ստադիոնում 2:1 հաշվով հաղթեց Իռլանդիայի թիմին։
Սա թիմի նորանշանակ գլխավոր մարզիչ Եղիշե Մելիքյանի առաջին հաղթանակն է: Նախորդ խաղում մերոնք 0-5 հաշվով ջախջախիչ պարտություն էին կրել Պորտուգալիայից: 
Բայց դրանից ընդամենը երեք օր անց մենք տեսանք գրեթե լրիվ կերպարանափոխված թիմ, որի մոտ, չնայած բացթողումներին, շատ ու շատ բան էր ստացվում: 
Եղիշե Մելիքյանի գլխավորած թիմն իսկապես էլ տպավորիչ խաղ ցույց տվեց` հանդիպման մեծ մասում ունենալով խաղային առավելություն։

Հայաստանի հավաքականից գոլերը խփեցին Էդուարդ Սպերցյանն ու Հրանտ-Լեոն Ռանոսը։ Իռլանդացիներից աչքի ընկավ Էվան Ֆերգյուսոնը։

Եվս մեկ հրաշալի հնարավորություն ունեցավ Ռանոսը, սակայն այդ դրվագում նրա առաջին հարվածն իր վրա վերցրեց մրցակցի պաշտպանը, իսկ երկրորդ հարվածից հետո գնդակը դիպավ հորիզոնական ձողին: 
Մեկ անգամ էլ Սպերցյանը, որ այսօրվա խաղում ուղղակիորեն գերազանց դրսևորեց իրեն, մրցակցի պաշտպանությունը կտրող փոխանցմամբ Տիկնիզյանին դուրս բերեց Իռյանդիայի դարպասապահի դեմ, բայց էլի հարվածը նպատակակետին չհասավ: 
Խաղավարտին մոտ Մելիքյանի սաները ևս մեկ հրաշալի գոլ խփեցին. աչքի ընկավ Սերոբյանը, սակայն ՎԱՌ համակարգով գոլը չեղարկվեց, նշումով, թե Տիկնիզյանը խաղից դուրս վիճակում էր, ինչկ անկեղծ ասած, համոզիչ չէր: 
Անդրադարձն ամբողջական չի լինի, եթե չնշենք երիտասարդ պաշտպան Էրիկ Փիլոյանին, ով մրցակցի հարվածից հետո գնդակը գծի վրայից հեռացրեց անպաշտպան մնացած դարպասից: 
Տևական դադարից հետո Հայաստանի հավաքականը վերջապես հաղթանակ տարավ: 

Հայաստանի հավաքականն ընտրական մրցաշարում առաջին ու նշենք՝ վաստակած հաղթանակը տարավ` 3 միավորով F խմբում բարձրանալով երկրորդ տեղ։ Իռալանդացիները 1 միավորով չորրորդն են։

Հայաստանի հավաքականն ընտրական մրցաշարում հաջորդ հանդիպումը կանցնացնի հոկտեմբերի 10-ին և հյուրընկալվի Հունգարիային։