«Թույլ չենք տալու խաղահրապարակի տեղում 18-հարկանի շենքեր կառուցել»․ Արթուր Չախոյան

Բլոգեր Արթուր Չախոյանի ֆեյսբուքյան գրառումը․

«Ինչպես արդեն շատերդ տեղյակ եք, ես և մեր բակի բնակիչները պայքարում ենք, որպեսզի մեր բակի միակ խաղահրապարակի փոխարեն 18-հարկանի շենքեր չկառուցվեն։ Մենք ակտիվ մասնակցել ենք օրենքով նախատեսված չորս հանրային քննարկումներին, որոնցից երեքի դեպքում վարչական շրջանը տվել է բացասական եզրակացություն, և ավագանին նույնպես մերժել է շինթույլտվություն տրամադրել։ Նոր Նորք վարչական շրջանի ղեկավարությունը վերջին հանրային քննարկմանը նույնպես տվել է բացասական եզրակացություն 18-հարկանի շենքեր չկառուցելու համար։ Սակայն մեր ուրախությունը երկար չտևեց:

Սեպտեմբերի 9-ին Երևանի ավագանու չզեկուցվող օրակարգով նախատեսվում է մեր բակի միակ խաղահրապարակի հաշվին տրամադրել շինթույլտվություն 18-հարկանի շենքերի կառուցման համար։ Սա այն դեպքում, երբ ավագանին նախորդ երեք անգամ արդեն մերժել էր շինթույլտվություն տրամադրելու հարցը։ Այսինքն՝ մեր բակի միակ խաղահրապարակի տարածքի փոխարեն ուզում են կառուցել 18-հարկանի շենքեր։ Քաղաքային իշխանության նման որոշումը բացահայտ ոտնահարում է մեր սահմանադրական իրավունքները։

Քանի որ ըստ ՀՀ հողային օրենսգրքի 60-րդ հոդվածի՝ խաղահրապարակի տարածքը համարվում է օտարման ոչ ենթակա հող, և դրա վաճառքն օրենքով արգելվում է։ Այնուամենայնիվ մեր բակի միակ խաղահրապարակի տարածքը ապօրինի վաճառվել է, և այժմ ցանկանում են այնտեղ կառուցել 18-հարկանի շենքեր։ Մեր սահմանադրական իրավունքները ոտնահարված են, և մենք չենք պատրաստվում լռել ու համակերպվել անարդարության հետ։

Այդ պատճառով՝ բակի երեխաների միակ խաղահրապարակի ոչնչացումը թույլ չտալու համար մենք՝ բակի բնակիչներս և խաղահրապարակի համար մեկ փոքրիկ շահառուները, սեպտեմբերի 9-ին՝ ավագանու նիստի օրը, իրականացնելու ենք ակցիա։ Մեր նպատակն է, որ ավագանիները հասկանան խնդրի կարևորությունը և համայնքի շահից ելնելով կայացնեն ճիշտ որոշում։ Բոլոր լրատվականներին խնդրում եմ Սեպտեմբերի 9-ին, ժամը 09:00-ին, լուսաբանել ակցիան»։