Ինչու՞ է ՀՅԴ -ն «ատամ» ցույց տալիս Սերժ Սարգսյանին

Վեիջին օրերին մի տեսակ խուլ դժգոհություն է նկատվում ՀՅԴ վերնախավի շարքերում՝ ՀՀԿ-ի հանդեպ: Երկրում ընթացող գործնթացների վերաբերյալ դաշնակցականները փորձում են որոշ շեշտադրումներով փոքր ինչ տարբերվել ՀՀԿ-ից: Սակայն առավել կոշտ նրանք վերջերս արտահայտեցին իրենց դիրքորոշումը հենց ընտրական օրենսգրքի փոփոխության վերաբերյալ:

Ֆորմալ տեսանկյունից ՀՅԴ ու ՀՀԿ-ի ընդհանուր համաձայնության հուշագրում նշված էր, որ կողմերը պետք է շարունակեն բարեփոխել ներկայիս գործող ընտրական օրենսգիրքը: Սակայն թե ինչ ուղղությամբ այդ աշխատանքները պիտի տարվեն, ոչ մի խոսք չկա: Դաշնակցականները չեն էլ թաքցնում, որ դժգոհ են ներկայիս ռեյտինգային կոչվող համակարգից, քանզի այն ընդհունվել է բացառապես ՀՀԿ-ի շահերից ելնելով: Իսկ վերջինս չի էլ պատրաստվում լուրջ փոփոխությունների գնալ այս հարցում: ՀՅԴ-ում այնքան են նյարդայնացած, որ Արմեն Ռուստամյանը հայտարարեց, թե այս հարցի շուրջ նրանք նույնիսկ կարող են ԲՀԿ-ի հետ էլ ակտիվ համագործակցել՝ հիշեցնելով «քառյակի» փորձը: Նման դեմարշը իրոք, որ ցույց է տալիս ՀՅԴ-ի ներսում հասունացած դժգոհության չափը՝ ՀՀԿ-ի հանդեպ:

Այս ամենը հուշում է մեկ բան, ՀՅԴ -ն, օգտվելով ներկայիս հարմար առիթից, փորձում է գործող նախագահից պոկել հնարավոր առավելագույնը: Առջևում ՀՀ նախագահի ընտրություններն են, և որ ավելի կարևոր է, ներկայիս ԱԺ-ն ընտրելու է Սերժ Սարգսյանին վարչապետ, իսկ հետո էլ կազմվելու է նոր իշխանական կոալիցիա:

Հենց այս փուլում է հնարավոր Սերժ Սարգսյանից պոկել հնարավորինս շատ զիջումներ: ՀՅԴ-ում շատ լավ հասկանում են, որ ՀՀԿ-ն երբեք չի գնա ռեյտինգային համակարգի վերափոխման ու առավել ևս՝ վերացման: Սա նրանց հրեշտակ-պահապան օրենքն է, որի միջոցով մտադիր են հավերժորեն իշխել: Սակայն այլ հարցերում զիջումներ կորզել հնարավոր կլինի: Պարզապես բողոք-պահանջը պիտի քաղաքական լինի, որպեսզի այն ազդի, ինչը դաշնակցականները հրաշալի հասկանում են:

Արտակ Հակոբյան