Բյուջեի մսխումները և կոռուպցիայի բացահայտումները (տեսանյութ)

Այս անգամ այցելել ենք Մալաթիա-Սեբաստիա վարչական շրջան, որտեղ ակներև է՝ քաղաքային իշխանության կամ ապիկարությունն ու անգրագիտությունը, կամ մինչև ականջները կոռուպցիայի մեջ թաթախված լինելը։

Կարճ ներկայացնեմ խնդիրը, ավելի մանրամասն տեղեկացեք տեսանյութերից։ Մալաթիա-Սեբաստիա վարչական շրջանի Բաբաջանյան 115 և Օհանով 6 հասցեներում կատարվել են «բարեկարգման» աշխատանքներ մեկ պայմանագրով, իսկ Շերամի 115-ում՝ այլ պայմանագրով։ Տեղային և փաստաթղթերի ուսումնասիրության արդյունքում պարզվեց, որ նույն խաղասարքը՝ նոր մանկական խաղասարք (պտտվող կարուսել), Բաբաջանյան 115-ում ձեռք են բերել 600.000 դրամով, իսկ Օհանով 6-ում՝ 450.000 դրամ։ Կամ նոր մանկական խաղասարք (զսպանակով ճոճանակ)՝ ձեռքբերումը Բաբաջանյան 115-ում՝ 550.000 դրամ, իսկ Օհանով 6-ում՝ 400.000 դրամ։ Նաև պարզ դարձավ, որ Շերամի 115-ում նստարանները ձեռք են բերել 50.000 դրամով, իսկ մյուս հասցեներում՝ 90.000 դրամով։

Ստացվում է, որ քաղաքային իշխանությունները անցել են թալանի ամենաբարձր (կամ՝ ամենացածր) մակարդակին։ Նրանք փորձում են փող գրպանել նույնիսկ խաղասարքերից։ ԱՆԻՖ-ը թալանելը, շինթույլտվությունների գումարները, տրանսպորտի, աղբահանության, գույքահարկերի և այլնի թանկացումները քիչ են, հիմա էլ անցել են խաղասարքերին, նստարաններին և աղբամաններին։ Սա նշանակում է, որ ՔՊ-ն զգում է մոտալուտ վախճանը և ամեն ինչ անում է՝ իրենց գրպանները արագ լցնեն։