Ադրբեջանցի վերլուծաբանը մտահոգված է, որ իր երկիրը կարող է ունենալ Ուկրաինայի ճակատագիրը

Թրամփ-Փաշինյան-Ալիև համաձայանագրի շուրջ քննարկումները դեռ երկար են շարունակվելու: Սակայն գրեթե բոլորի համար պարզ է դառնում, որ այս համաձայնագիրը ոչ թե խաղաղության դուռ է բացելու, այլ նոր և ավելի մեծ պատերազմների պատճառ է դառնալու, որոնց մեջ իրենց երկրները գցել են Փաշինյանն ու Ալիևը:

Ընդ որում, այս ամենն արդեն սկսել են հասկանալ որոշ ադրբեջանցի վերլուծաբաններ:

Մասնավորապես, Ադրբեջանի հետազոտական կենտրոնի ղեկավար, քաղաքական վերլուծաբան Օրխանը այն կարծիքն է հայտնել, որ Արևմուտքը պատրաստվում է Ադրբեջանին դարձնել «նոր Ուկրաինա»՝ ընդդեմ Ռուսաստանի և Իրանի:

Ճիշտ է, դրա արդյունքում, ոտի տակ կընկնի նաև Հայաստանը, սակայն, ըստ նրա՝ գլխավոր հարվածը կստանա հենց Ադրբեջանը:

Ըստ նրա՝ ռուս-ուկրաինական պատերազմը պետք էր Արևմուտքին, որպեսզի, նրանք ուրիշի ձեռքերով փորձեն թուլացնել Ռուսաստանը:

Այդ համատեքստում Ուկրաինան պիտի դառնար Ռուսաստանի համար «նոր Վիետնամ»:

Ըստ նրա՝ երկրորդ փուլում Արևմուտքը պիտի բացեր նոր ճակատ Ռուսաստանի դեմ, արդեն Կովկասից և Միջին Ասիայից:

«...Ռիչարդ Մուրն ունի անգլոսաքսոնական ծրագիր։ Ո՞րն է այս ծրագրի էությունը։ Ես արդեն մեկ անգամ ասել եմ՝ դա ռեսուրսների տեղափոխման ուղիների վերահսկողությունն է։ Եվ ամենակարևոր ուղիներից մեկն անցնում է Կովկասով։ Ինչո՞ւ է սա անհրաժեշտ։ Հակամարտության մեջ ներքաշել մինչև Չինաստան և Կենտրոնական Ասիա, և դա պետք է տեղի ունենա։

Առաջին փուլում, Արևմուտքը լուծեց Ղարաբաղի խնդիրը, իսկ երկրորդ փուլում պատրաստվում է լուծել Զանգեզուրի հարցը»,- նշում է ադրբեջանցի փորձագետը:

Ըստ նրա՝ Զանգեզուրը պետք է ոչ այնքան  Ադրբեջանին, որքան  Արևմուտքին, ՆԱՏՕ-ին։ Իսկ Ադրբեջանում մինչև 2030 թվականը կոչնչացնեն ժողովրդի գենոֆոնդը, կվերացնեն շիական ուսմունքը։ Նոր սերունդ  կձևավորեն, որը պիտի պատրաստ լինի հակամարտել Իրանի և Ռուսաստանի դեմ։

Իսրայելական և արևմտյան կենտրոնները Ադրբեջանում խոշոր սադրանք պատրաստվում  իրականացնել Իրանի դեմ։

Մեծածավալ սադրանք։ Պատահական չէ, որ նրանք Ադրբեջան բերեցին Arrow-3, Green Pine համակարգեր, և դրանցից ոչ մեկը չի գտնվում ադրբեջանական վերահսկողության տակ։ Սա պատահական չէ։ Նրանք Ադրբեջան բերեցին բալիստիկ հրթիռներ և հետախուզական  համակարգեր։ Նրանք նաև բերեցին բազմաթիվ անօդաչու թռչող սարքեր՝ մինչև 2000 կմ հեռահարությամբ։

Նրանք պատրաստվում են բերել  հռթիռային համալիրներ Հայմեռներ, որոնք այսօր օգտագործվում են Ուկրաինայում: Եվ այս ամենը  ադրբեջանական բանակի վերահսկողության տակ չեն լինելու։ Սա պատահականություն չէ, նշում է մտահոգված ադրբեջանցի վերլուծաբանը:

Ադրբեջանցի վերլուծաբանը զգուշացնում է իր հայրենակիցներին, նշելով, որ Զանգեզուրի հարցի լուծումը, խայծ է լինելու Ադրբեջանի համար:

Չեխովն ունի մի արտահայտություն. «Եթե առաջին գործողության ժամանակ պատից կախված է հրացան, ապա վերջին գործողության ժամանակ այն անպայման պետք է կրակի»։ Եթե տարիներ շարունակ մեզ ասել են, որ Իրանը մեր թշնամին է, վստահ եղեք. նրանք ժողովրդին պատրաստել են Իրանի դեմ պատերազմի։ Սա պատահական չէ։ Առաջին գործողության մեջ տեսած հրացանը պետք է կրակի վերջին գործողության մեջ։ Եթե 30 տարի շարունակ նրանք գումար են ծախսել, փոխել են ժողովրդի ազգային ինքնությունը, վստահ եղեք. նրանք նրանց պատրաստել են պատերազմի, նշում է մտահոգված ադրբեջանցի փորձագետը։

«...Ինչո՞ւ։ Որովհետև Իրանի և Իսրայելի միջև պատերազմը անխուսափելի է։ Եվ այն կանխելու լավագույն միջոցը եղբորը եղբոր դեմ հանելն է։ Ստեղծել պայմաններ, որպեսզի եղբայրը չկարողանա խուսափել դրանից...»,- նշում է Օրխանը:

Ինչպես որ նույն Արևմուտքը Ռուսաստանի դեմ պատերազմում է Ուկրաինայի ձեռքերով:

Հասկանալի է, որ ԱՄՆ-ն այս տարածաշրջանում ոչ թե խաղաղություն է փնտրում, այլ՝ իր հակառակորդների համար նոր «մանրադրամներ», մանավանդ, որ ի տարբերություն Ուկրաինայի, որը գտնվում է Եվրոպայի սրտում և մտահոգություն է առաջացնում եվրոպացիների մոտ, կովկասյան այս «մանրադրամների»  ձևավորումը ոչ մի խնդիր չի առաջացնի ոչ ԱՄՆ-ում, ոչ էլ Եվրոպայում, քանզի նոր հակամարտության գոտին կլինի իրենցից հեռու տարածաշրջանում:

Ըստ ադրբեջանցի վերլուծաբանի՝ Վրաստանը հրաժարվեց այդ առաջարկից, մինչդեռ Հայաստանի և Ադրբեջանի ղեկավարները հաճույքով ընդունեցին այդ առաջարկը՝ իրենց ժողովուրդներին դարձնել «մանրադրամներ»:

Թվում է, թե այսօր այս տարբերակն ավելի շահեկան է Ադրբեջանի համար, սակայն վերջնաարդյունքում հենց Ադրբեջանն է դառնալու այս նախագծի գլխավոր հարվածը:

Իհարկե Հայաստանն էլ չի խուսափի հարվածներից, սակայն Ադրբեջանը կլինի գլխավոր թիրախի դերում:

Չի կարելի չհամաձայնվել ադրբեջանցի այս վերլուծաբանի գնահատականների հետ, մանավանդ, որ հետագա քայլերի տրամաբանությունը նույնպես կանխատեսելի է:

Իսկ թե ինչու Ալիևն ու Փաշինյանը համաձայնեցին Հայաստանն ու Ադրբեջանը դարձնել ապագա հակամարտության գոտի, պատճառները տարբեր են, սակայն վերջնաարդյունքը նույն է լինելու, թե՛ Հայաստանի, և թե՛ Ադրբեջանի համար:

Սա է իրականությունը:

Արտակ Հակոբյան
Zham.am