Այդ համատեղ հայտարարությունը ո՛չ միայն չի արտացոլում Հայաստանի պետական և ազգային շահերը, այլև հարված է Հայաստանի ինքնիշխանությանը. ՀՅԴ

Վաշինգտոնում կայացած Ամերիկայի Միացյալ Նահանգների, Հայաստանի և Ադրբեջանի եռակողմ հանդիպման և համատեղ հայատարության մասին ՀՅԴ Բյուրոն հանդես է եկե հայտարարությամբ, որի մեջ ասվում է.

«2025թ. օգոստոսի 8-ին ԱՄՆ նախագահ Դոնալդ Թրամփի միջնորդությամբ Վաշինգտոնում ստորագրուած ԱՄՆ, Հայաստան, Ադրբեջան համատեղ հայտարարությունը ո՛չ միայն չի արտացոլում Հայաստանի Հանրապետության պետական և ազգային շահերը, այլև հարված է Հայաստանի ինքնիշխանությանը։

ՀՀ իշխող վարչակազմի որդեգրած քաղաքականությունն ու անհահասարակշիռ որոշումներն ընդունվել են գաղտնիության պայմաններում։ Դրանք ոտնահարում են հայ ժողովրդի հավաքական իրավունքներն ու կենսական շահերը, ստեղծում են անվտանգային նոր մարտահրավերներ և սպառնալիքներ, խաթարում են տարածաշրջանի ռազմաքաղաքական հաւասարակշռությոնն ու ՀՀ տարածքային ամբողջականությունը՝ կասկածի տակ դնելով ՀՀ պետականության գոյությունը։

Շարունակական կեղծիքների, սուտ խոստումների եւ ամբոխավարության քողի ներքո ոտնատակ են տրվել Հայաստանն ու հայ ժողովրդի շահերը։ ՀՀ իշխող վարչակազմի որդեգրած ապազգային եւ անհեռանկար քաղաքականության արտացոլանք հանդիսացող, իր էությամբ հակապետական հայտարարությունը մեկ նպատակադրում ունի՝ ի գին ՀՀ իրավունքների, օտար շահեր սպասարկող ՀՀ իշխող վարչակազմի վերարտադրություն՝ Հայաստանը դարձնելով աշխարհաքաղաքական շահերի բախման թատերաբեմ։

Ադրբեջանի շարունակական նախապայմանների, արցախահայության նկատմամբ իրականացված ցեղասպանական գործողությունների, Արցախի էթնիկ զտման եւ ամբողջական հայաթափման, ՀՀ տարածքների բռնազավթման, Բաքվում ընթացող կեղծ դատավարությունների և արցախահայության վերադարձի իրավունքի ոտնահարման և հանուն շահի այս ամենի վրա մեծ տերությունների աչք փակելու պայմաններում՝ Հայաստանի և Ադրբեջանի միջև վստահության մթնոլորտի ձեւավորումը ո՛չ միայն իրատեսական չէ, այլեւ՝ բնույթով կապիտուլացիոն:

Ըստ այդմ

• Հայտարարում ենք՝ Արցախի հակամարտությունը լուծված չէ, և միջազգային հանրությունը՝ մասնաւորապես ԵԱՀԿ-ն, որպես այս խնդրի կարգավորման միջազգային օրինական մանդատ ունեցող միակ հարթակ, պարտավոր են գործել այն հանգուցալուծելու ուղղությամբ։

• Ընդգծում ենք՝ ստորագրված հայտարարությունը, ըստ էության, օրինականացնում է միջանցքի գաղափարը եւ ուղղուած է բացառապես ադրբեջանական շահերի սպասարկմանը։

• Հաստատում ենք՝ ցանկացած անվամբ և կարգավիճակով Ադրբեջանին Հայաստանի Հանրապետության տարածքով «անխոչընդոտ հաղորդակցություն» տրամադրելն, իրականում, «թուրանական միջանցք»-ի իրացում է եւ Հայաստանի իքնիշխանության ոտնահարում։

• Պահանջում ենք՝ ՀՀ տարածքից Ադրբեջանի զինված ուժերի դուրսբերում, Արցախի ռազմաքաղաքական պատանդների անհապաղ ազատ արձակում, Արցախի հայության հավաքական, անվտանգ, երաշխավորված և արժանապատիվ վերադարձի համար պայմանների ստեղծում։

• Համոզուած ենք, որ ռազմական գործողությունների և ցեղասպանական հանցագործությունների արդյունքում ձևավորված ստատուս քվոն չի կարող հանգեցնել կայուն խաղաղության։

Հ.Յ.Դաշնակցությունը հավատարիմ է մնում ժողովրդավարության, արդարության և արժանապատիվ խաղաղության հաստատման միջազգային սկզբունքներին»։