Հայ-ադրբեջանական կոնֆլիկտի «թրամփավարի» լուծումը կարող է էլ ավելի լարել իրավիճակը, պրոբլեմատիկ լինել Հայաստանի համար. Արմեն Աշոտյան

«Ակնհայտ է, որ ԱՄՆ նախագահի համար իր պաշտոնավարման մի մասը վերածվել է  Նոբելյան մրցանակի համար բոնուսներ հավաքելու շրջանի»,- ասուլիսում ասաց ՀՀԿ փոխնախագահ Արմեն Աշոտյանը՝ պատասխանելով առաջիկայում ԱՄՆ-ում Փաշինյան-Ալիև հնարավոր հանդիպման մասին հարցին։ 

Ըստ Աշոտյանի, Թրամփի համար հայ-ադրբեջանական կոնֆլիկտի  «թրամփավարի» հանգուցալուծումը կարող է լինել Նոբելյան  կրեդիտ քարտի վրա որոշակի քաղաքական հերթական բոնուսը։

Նա նշեց, որ երկու մտավախություն ունի այս առումով. «Գեոպոլիտիկ, որովհետև նման տեսակի գործարքի հնարավոր ի հայտ գալը տարածաշրջանում բնական  գեոպոլիտիկ ներկայություն չունեցող ուժի հովանու ներքո՝ պրոբլեմատիկ է լինելու Հայաստանի արտաքին ու անվտանգային միջավայրերի համար։

Հիշեցնեմ, որ երկար ժամանակ է Փաշինյանի բանագնացներն ու բանախոսները հպարտանում էին, որ որևէ միջնորդի կարիք չունեն, շատ լավ բանակցում են Ադրբեջանի հետ։ Իհարկե, դա սուտ է, շատ վատ են աշխատում Ադրբեջանի հետ, դժվար է այն, ինչ կատարվում է, բանակցություն կոչելը։

Երկրորդ՝ հիշեցնեմ, որ 2020  թվականի հոկտեմբերի 26-ին՝ 44-օրյա պատերազմի ժամանակ հրադադարի ռեժիմ հաստատելու ամերիկյան փորձն արվեց։ Ինչքա՞ն տևեց՝ մի քանի ժամ։ Ի՞նչ արժեք ուներ այն թուղթը, որ ստորագրվեց  Թրամփի նախորդ ադմինիստրացիայի հովանու ներքո այն ժամանակվա Հայաստանի ու Ադրբեջանի ԱԳ նախարարների օրոք։ Ի՞նչ կյանք ունեցավ այդ թուղթը։

Մենք գիտենք, որ այդպիսի թղթերը, որոնք ոչնչով հիմնավորված չեն, չունեն ռեալ բովանդակություն, ոչ թե մեր տրածաշրջանում հողի վրա լուծում են իրավիճակը, էլ ավելի են լարում այն իրավիճակը, որը ստեղծվել է»։

Աշոտյանը նաև ասաց. «Ես համաձայն չեմ, որ Ռուսաստանը հանձնեց Արցախը: Դաժան թող հնչի, Արցախը հանձնեց հայ ժողովուրդը չպայքարելով այն իշխանության դեմ, որին բերել էր և որի ձեռքերով հանձնվեց Արցախը: Արցախը դարձավ Նիկոլի անձնական ամբիցիաների քաղաքական տերերի, խարդավանքների տարաբնույթ գեոպոլիտիկ կոմբինացիաների զոհը»։
Աղբյուրը` Panorama.am