Երբ հսկիչները սկսեն սանկցիաներ կիրառել, բումերանգի էֆեկտով հարվածը վերադառնալու է իրենց. Մանուկ Սուքիասյան

Մեկանգամյա QR կոդերի շրջանառությունից հանելու հետևանքով այսօր հատկապես մետրոներում են հերթեր արձանագրվել, բայց հատկանշական է, որ թղթային տարբերակներն այդուհանդերձ դեռ կան։ Այս մասին «Փաստինֆոյի» հետ զրույցում ասաց Երևանի ավագանու «Մայր Հայաստան» խմբակցության ղեկավար Մանուկ Սուքիասյանը՝ ընդգծելով, որ ստացվում է, որ քաղաքապետարանն իր հայտարարությունը և որոշումների կիրառումը չի կարողանում ապահովել։

«Այս առնչությամբ հայտարարել են, որ ամսի 4-ին հանդես են գալու ասուլիսով ու պարզաբանումներ են ներկայացնելու։ Ամեն դեպքում սա ևս լրացուցիչ անհարմարություն է։ Այս տուգանքները, սպառնալիքները՝ քաղաքացուն տուգանքի մատերիալ դարձնելու Փաշինյանի հայտնի թեզը, քաղաքապետարանն ակտիվ իրագործում է»։

Նրա դիտարկմամբ՝ ամիսներ առաջ պայքարի արդյունքում շրջանառության մեջ մտցրած 1-անգամյա տոմսերը հանելով՝ ՔՊ-ն մարդկանցից միանգամից մեծ գումարներ հավաքագրելու խնդիր է լուծում, այն պարագայում, որ հանգամանքների բերումով, վատառողջության արդյունքում, մարդիկ կարող են այսպես էլ չօգտվել բազմակի կիրառության փաթեթներից, բայց վերջնարդյունքում ստացվի, որ քաղաքապետարանը հավաքագրեց իր համար անհրաժեշտ թիվը։

Նա նաև հիշեցրեց, որ շաբաթվա սկզբին գործակարգավարական խորհրդակցության ընթացքում Ավինյանն հայտարարել էր, որ հսկիչները անցնելու են վերապատրաստում։ «Կարծում եմ՝ սա 1-2 օրվա բան չէ։ Դեռ հարց է՝ կկարողանա՞ն այդքան հսկիչներ աշխատանքի ընդունել, նրանց հրահանգավորել՝ ինչպես են ստուգելու, ինչպես են տուգանելու, տրանսպորտում, պիկ ժամերին, երբ աստիճանավանդակից առաջ գնալը բավական դժվար է՝ ինչպես են մարդիկ հասնելու վալիդատորին, որ կարողանան վճարել, ինչպես են հարկադրելու մարդկանց, որ վճարեն, ինչպես են ստուգելու՝ վճարե՞լ են, թե ոչ, ինչ գործ ունեն առհասարակ այդ հրահանգիչները՝ մտնել մարդկանց բանկային քարտերի մեջ, որ ստուգեն՝ կա վճարում, թե ոչ։ Այս խնդիրները խոսում են այն մասին, որ քաղաքացի-քաղաքային իշխանություն կապը խաթարված է, և միայն սպառնալիքի և տուգանքի լեզվով կարող են այս իշխանությունները քաղաքացիներին որևէ բան պարտադրել։ Սա խոսում է այն մասին, որ բոյկոտը ստացվել է, այլապես, եթե բոյկոտ չլիներ՝ իրենք չէին գնա Ազգային ժողով, որ «մարդ բերեին» քաղաքացու վրա, որպեսզի կարողանային օրենքներ փոխել, որպեսզի քաղաքացիներին դարձնեն տուգանքի մատերիալ»։

Դիտարկմանը, թե արդյոք մեկանգամյա տոմսերը շրջանառությունից հանելն՝ հսկիչների բացակայության պայմաններում, էլ ավելի թերհավաքագրումների պատճառ չի՞ դառնալու՝ Սուքիասյանն ասաց, որ բնականաբար այդպես էլ լինելու է, քանի որ դա իրենք առանց լուրջ հաշվարկի, առանց պրոցեսի երկու ծայրերն իրար միացնելու մեխանիզմի՝ հերթական ցայտնոտային քայլն են կատարել, որը խոսում է այն մասին, որ իրենք իրենց տեղում չեն։

Հարցին, թե իրենք ինչ են անելու, քանի որ որոշ ժամանակ քաղաքացուն հորդորում էին բոյկոտել, հետո դադարեցին՝ նա նշեց, որ բոյկոտը չի դադարել, որովհետև իրենք չեն որոշել, որ այլևս պետք չէ այդ բոյկոտ անել։ «Բոյկոտը ինքնաշխատ դրսևորում է, ու եթե բոյկոտը ինքնուրույն, ինքնաբերաբար աշխատում է, ապա մենք մեր առջև դրված խնդիրը լուծել ենք, նաև դա է ստիպել իշխանություններին գնալ ԱԺ ու նոր աշխատակիցներ ընդունել, հրահանգավորել, որ քաղաքացիներին տուգանեն։ Դրա համար պետք չէր, որ մենք փետրվարից մինչև հիմա լինեինք հանրային տրանսպորտում։ Ովքեր պետք է բոյկոտեին՝ բոյկոտում էին, բայց նաև մենք հիմա իրավաբանների հետ խորհրդակցություններ ենք անցկացնում՝ տեսնենք, թե ինչ իրավական գործիքակազմ կարելի է կիրառել տուգանքային այս ասպատակությունների դեմ քաղաքացիներին զինելու համար։ Հաջորդ շաբաթվա կեսերին կոնկրետ իրավական ասելիք կունենանք»։