Իհարկե, չեմ բացառում թանկացումը․ էլեկտրաէներգիայի սակագինը բազմակոմպոնենտ թիվ է․ ՀԾԿՀ փաշինյանական նախագահ
Պնդել, որ միանշանակ սակագինը բարձրանալու է, նման բան այս պահին որևէ մեկը չի կարող ասել։ Այս մասին այսօր՝ հուլիսի 24–ին, կառավարության նիստից հետո լրագրողների հետ ճեպազրույցի ժամանակ նշեց Հանրային ծառայությունները կարգավորող հանձնաժողովի նախագահ Մեսրոպ Մեսրոպյանը։
«Իհարկե, չեմ բացառում թանկացումը։ Սակագնի թանկացումը կարող էր լինել առանց այս պրոցեսների, որովհետև էլեկտրաէներգիայի սակագինը բազմակոմպոնենտ թիվ է։ Այն կախված է արտարժույթի կուրսից, կախված է տվյալ տարվա փաստացի բալանսներից, որովհետև էլեկտրաէներգիայի արտադրությունը պլանավորվում է, հետո վերջում այլ բան է ստացվում, հազար մի գործոն կա»,–ասաց նա։
Դիտարկմանը՝ ՀԷՑ-ը սակագնի բարձրացումը զսպել է, քանի որ վարկ է վերցրել, իսկ Դուք և Ռոմանոս Պետրոսյանն ինչ եկել եք ակնակրկում եք թանկացման մասին, նա ասաց. «Ես որևէ բան չեմ ակնարկում, դուք ինձ տեսական հարց եք տալիս, ես ձեզ պարտավոր եմ ճշմարտությունը ասել տեսական հարթության մեջ։ Ես չեմ ակնարկում, որ սակագին կբարձրանա։
Այդ հարցն ունի երկու պատասխան՝ այո՛, կարող է բարձրանալ, ո՛չ, չի բարձրանա: Երբ տարվա վերջում Հանձնաժողովը սակագների վերահաշվարկի պրոցեսը սկսում է, այդ ժամանակ է պարզ լինում սակագինը կբարձրանա՞, թե չի բարձրանա: Օդի մեջ մերկապարանոց հայտարարություններ չենք կարող անել»,- հայտարարեց Մեսրոպյանը:
Հետևեք մեզ Facebook-ում