Այս սցենարը կանխատեսում էի, չեմ բացառում, որ կարող է մի գործ կարեն, ինձ էլ տանեն. Դավիթ Ղազինյանը՝ Ռոմանոս Պետրոսյանի հայտարարությունների մասին

«Չեմ կարողանում հասկանալ՝ այսօր որոշել էր երևի իմ ազգանվան վրա ինքնահաստատվել։ Բայց ես մեր ձևովն ասել եմ՝ որն է։ Մեր ձևովը եղել է  ի բարօրություն մեր 3 միլիոն բնակչության, բաժանորդի»,- ՀԷՑ  գլխավոր գրասենյակի մոտ լրագրողներին ասաց ՀԷՑ Գլխավոր տնօրենի տեղակալ Դավիթ Ղազինյանը՝ պատասխանելով ՀԷՑ-ի ժամանակավոր կառավարիչ Ռոմանոս Պետրոսյանի հայտարարությանը, որ Դավիթ Ղազինյանը «ձև չունի մնալու», «այս պահին արդեն կոչ կանեմ պարոն Ղազինյանին  ազատման դիմում գրել և հեռանալ»։

Հարցին՝ հանձնվել ու դո՞ւրս է եկել  շենքից, նա պատասխանեց. «Ո՞վ դուրս եկավ։ Այստեղ 20 տարի աշխատել եմ, որպեսզի կեղծ մեղադրանքներով... Խնդրեմ, իշխանությունն իրենց ձեռքում է, թող ապացուցեն՝ ի՞նչ է նշանակում անվստահության... Իսկ ո՞վ է ասում, որ ես իրեն վստահում եմ, ես անձամբ իրեն, իրենց իշխանությանը չեմ վստահում»։

Ղազինյանն ասաց, որ հրաժարականի դիմում չի գրելու. «Եթե գնում են «բեսպրեդելի» տարբերով, ամեն ինչ կարող են, փորձը ցույց է տվել, որ կարող են։

Ես այս սցենարն ի սկզբանե կանխատեսում էի։ Կարծում եմ՝ փորձ է արվում կոտրել ինչ որ դիմադրություն, որ տեսեք՝ Ղազինյանին  բեսպրեդելով ազատեցինք, ձեզ ինչ կանենք, ոնց կանենք։ Կոչ եմ անում  մեր 6800 աշխատակիցն, մեծ մասին անձամբ ճանաչում եմ, մնալ, աշխատել մեր ձևով՝ ի բարօրություն մեր ժողովրդի։

Հիմա եկողներն ասում են՝ հանուն Հայաստանի Հանրապետության... Վերջին տարիներին տեսել ենք՝ հանուն Հայաստանի Հանրապետության ինչ է նշանակում»։

Ինչ վերաբերում է Ռոմանոս Պետոսյանի հայտարարությանը, որ սաբոտաժը քրեորեն պատժելի է, նա ասաց. «Ես ասել եմ սաբոտաժ չկա։  Իրավապահ մարմիններն իրենցն է, թող ապացուցեն։ Նման հայտարարություն առանց հիմքի, ապացույցի անելն անբարոյականություն է»։

Հարցին՝ Ռ.Պետորսյանն ասաց, թե ինչպե՞ս կարող է ՀԷՑ սեփականատեր Սամվել Կարապետյանը կանխատեսել, որ էլեկտրաէներգիայի սակագինը 10 տարի չի թանկանալու, Ղազինյանն ասաց. «Նա մանիպուլացրեց։ Լրագրողը հարցը տրվեց՝ Սամվել Կարապետյանը երաշխավորել է, որ 10 տարի չի բարձրանալու։ Ինքը խոսեց-խոսեց, ասաց՝ կարող է այնպիսի  տեխնոլոգիա հայտնաբերվի, որ իջնի։ Կարապետյանը չի ասել՝ չի իջնելու, հայտարարել է, որ չի բարձրանալու։ Չեմ ուզում Սամվել Կարապետյանի կարողությունն այս պահին կոնկրետ թվով ասել, բայց համարյա պետության  բյուջեի չափ օրինական ֆինանսական միջոցներ ունեցող մարդուն ասում են՝ ինչպես կարող ես երաշխավորել, որ կբարձրանա, թե ոչ»։

Լրագրողի հարցին՝ «իր գրպանի՞ց է նախատեսում», նա ասաց. «Իհարկե, ոնց որ եղել է։ Գոնե տաս տարի չի բարձրացել, չէ՞։

 Նորից չկարողացավ ֆիքսել, որ գոնե երկու տարի չի բարձրանալու սակագինը»։

Դ.Ղազինյանը նաև ասաց. «Չեմ բացառում, որ կարող է մի գործ կարեն, ինչ որ ձևով ինձ էլ տանեն։ Չեմ բացառում, չեմ վախենում, մինչև վերջ կանգնած եմ»։ 
Աղբյուրը` Panorama.am