Ինչո՞ւ են քննիչները մտել «Ֆլորենս» ռեստորան

Քննչական կոմիտեի քննիչները երեկ մտել են ՀՀ նախկին վարչապետ Կարեն Կարապետյանին պատկանող «Ֆլորենս» ռեստորան։

Լրագրող Սյուզի Բադոյանը հայտնել էր. «Դուրս են արել ներսում առիթ նշողներին, հացի վրա նստած հյուրերին, հապճեպ դատարկել են տվել ողջ «Ֆլորենսն» ու փակել են օբյեկտը։ Իսկ վաղը մեծ հարսանիք էր այստեղ լինելու»։

Panorama.am-ը քննչական կոմիտեից հետաքրքրվեց, թե ինչո՞ւ են քննիչները մտել այդ ռեստորան։

«Խուլիգանության դեպքի առթիվ նախաձեռնված քրեական վարույթի նախաքննության ընթացքում կատարվում են քննչական գործողություններ»,-հայտնեց ՔԿ խոսնակ Կիմա Ավդալյանը՝ ավելացնելով, որ այս պահին բերման ենթարկվածներ կամ ձերբակալվածներ չկան։

Panorama.am-ի տեղեկություններով, քննչական գործողությունները ռեստորանի սեփականատերերի հետ կապ չունի։ Ռեստորանի տարածքում խուլիգանական դեպք է տեղի ունեցել, ինչից հետո իրավապահներ են ժամանել։

Աղբյուրը` Panorama.am