Իշխանամետ, թուրքամետ ուժին սատարողին խմբակային հարձակումն ու ոստիկանի ծեծը «ներելի» են․ Չախոյան

Ակտիվիստ Արթուր Չախոյանը գրել է. «Այսօր Հայաստանում քիչ բան է զարմացնում, հատկապես՝ նմանատիպ «արդարադատությունը»։ Պրո-թուրքական կուսակցության ստեղծմանը սատարող անձը, ով խմբով հարձակվել է մեր վրա, հարվածել և ծեծի ենթարկել նաև ոստիկանի, ընդամենը դատապարտվել է 179 ժամ հանրային աշխատանքի։

Բոլորին պարզ է՝ եթե նման խուլիգանություն թույլ տար որևէ ընդդիմադիր, նրան ոչ միայն մի քանի ամսով կկալանավորեին, այլև դատարանը կկայացներ մի քանի տարվա ազատազրկման վճիռ։ Բայց այս դեպքում, քանի որ խոսքը իշխանամետ, թուրքամետ ուժին սատարող անձի մասին է, նույնիսկ խմբակային հարձակումն ու ոստիկանի ծեծը «ներելի» են։

Սա է ներկայիս Հայաստանի պատկերը, որտեղ արդարադատությունը որոշվում է ոչ թե օրենքով, այլ իշխանության վերին օղակների ցանկությամբ՝ ըստ այն բանի, թե ով է մեղադրյալը։ Երկակի ստանդարտներով «արդարադատություն», որը վաղուց վերածվել է պատվերով դատավարությունների։

Այս դատական որոշումը վերաբերում է անցած տարվա Երևանի հայտնի միջադեպին՝ պռո-թուրքական կուսակցության համագումարի ժամանակ տեղի ունեցած հարձակմանը։ Այդ օրը, երբ իրազեկման նպատակով, խմբով հարձակվել էին ինձ և իմ ընկերների վրա։ Դրանից հետո մեզ՝ տուժողներիս, անօրինական կերպով 3 օրով ձերբակալեցին։

Հետաքրքիրն այն է, որ հենց այս նույն դեպքի համար հիմա ես դատարանում մեղադրյալի կարգավիճակ ունեմ։ Փորձում են ինձ դատապարտել այն դեպքում, երբ նույն միջադեպի շրջանակում արդեն իսկ դատարանի վճռով Մորայր Մելքոնյանը ճանաչվել է մեղավոր։

Այո՛, այստեղ ոչ մի չափազանցություն չկա։ Պարզապես դա հերթական շինծու, աննախադեպ «ապուշ» քրեական գործն է, որով փորձում են ճնշել ինձ, ստիպել լռել ու չբարձրաձայնել իրականությունը»։