«Ռուս լրագրողների ձերբակալությունը չի համապատասխանում երկկողմ հարաբերությունների ոգուն»․ Պեսկով

Բաքվում ռուս լրագրողների ձերբակալությունը բացարձակապես չի համապատասխանում երկկողմ հարաբերությունների ընդունված նորմերին և ոգուն։ Այս մասին հայտնել է ՌԴ նախագահի մամուլի քարտուղար Դմիտրի Պեսկովը։ «Խոսքը կոնկրետ լրագրողների մասին է։ Եվ, իհարկե, լրատվամիջոցների ներկայացուցիչների դեմ նման միջոցառումները բացարձակապես չեն համապատասխանում համընդհանուր կանոններին և նորմերին, ռուս-ադրբեջանական հարաբերությունների ոգուն և բնույթին»,- ասել է Պեսկովը։

«Մենք կարծում ենք, որ այս հուզական, չափազանց հուզական արձագանքը կփոխարինվի անմիջական շփումով, որի ընթացքում պատասխաններ կտրվեն բոլոր հարցերին», - հավելել է Պեսկովը։

Հունիսի 30-ին Ադրբեջանի ՆԳՆ-ն հայտարարել էր, որ իրավապահ մարմինները գործողություն են իրականացնում «Sputnik Ադրբեջան» լրատվական գործակալության գրասենյակում։ Ավելի ուշ նախարարությունը հայտնել է գործակալության գրասենյակում մի քանի անձանց ձերբակալման մասին։