Հայաստանի ներկայիս իշխանությունները վարում են ազգային հիմնասյուների ապամոնտաժման քաղաքականություն. Իգոր Սեմենովսկի (տեսանյութ)

Ռուս քաղաքագետ Իգոր Սեմյոնովսկին Alpha News-ի հետ զրույցում մեկնաբանել է Հայաստանում ստեղծված իրավիճակը՝ կապված գործարար Սամվել Կարապետյանի, «Սրբազան պայքար» շարժման առաջնորդ Բագրատ Գալստանյանի և Միքայել արքեպիսկոպոս Աջապահյանի ձերբակալությունների հետ:

«Եթե իրավիճակին նայենք վերլուծական տեսանկյունից, ապա, ցավոք, անմիջապես անհանգստացնող տեսարաններ են ի հայտ գալիս. օրինակ, Կիև-Պեչորյան մայրավանքում տեղի ունեցած հարձակումները քահանաների վրա և սրբավայրերի պղծումը։ Հիշվում են նաև Մոլդովայում տասնօրյա վաղեմության իրադարձությունները, որտեղ քրիստոնեական հանրահավաքի ժամանակ ոստիկանությունը հարձակվել էր ուղղափառ քահանայի վրա, իսկ ԼԳԲՏ ներկայացուցիչները բացահայտ ծաղրել էին դա։ Չեմ կարող դատել, թե որքանով է դա նույնական, բայց, իհարկե, իրավիճակը համադրելի է։

Այն, ինչ այսօր տեղի է ունենում Հայաստանում, ոչ թե եզակի միջադեպ է, այլ ավելի շուտ հերթական տագնապալի փուլն է գործող վարչախմբի կողմից առաջացրած ձգձգվող ճգնաժամի մեջ։ Մենք տեսնում ենք հասարակական գիտակցությունից հենասյուները դուրս մղելու փորձեր՝ եկեղեցի, ավանդական արժեքներ, պատմական հիշողության ինստիտուտ և ազգային ինքնության այլ առանցքային տարրեր։ Այս համատեքստում Ռուսաստանի դիրքորոշումը, իմ կարծիքով, պետք է ավելի ակտիվ լինի։ Այո, հայտարարություններով արդեն հանդես են եկել ԱԳՆ պաշտոնական ներկայացուցիչ Մարիա Զախարովան և նախագահի մամուլի քարտուղար Դմիտրի Պեսկովը: Նրանք ընդգծել են չմիջամտելու անհրաժեշտությունը, սակայն պետք է հիշել, որ Սամվել Կարապետյանը Ռուսաստանի քաղաքացի է»,-նշել է փորձագետը։

Քաղաքագետի խոսքով՝ իշխանության համար, ով ընդդիմադիր դիրք է զբաղեցնում, ինքնաբերաբար ընկալվում է որպես հակառակորդ՝ լինի դա «Կրեմլի ձեռքը», թե «Պետդեպարտամենտի գործակալը»: