Անհարմար բան ստացվեց․ «ահաբեկիչների» զենքերն օրինական են, փամփուշտները՝ կրակված

Այսօր վաղ առավոտից իրավապահները խուզարկում էին «Սրբազան պայքար» շարժման առաջնորդ Բագրատ արքեպիսկոպոս Գալստանյանի, շարժման կողմնակիցների և մի շարք ընդդիմադիր գործիչների տները։

Ավելի ուշ ԱԱԾ աշխատակիցները ձերբակալեցին Բագրատ Սրբազանին, իսկ Քննչական կոմիտեն հայտարարություն տարածեց՝ տեղեկացնելով, որ «Սրբազան պայքարի» մասնակիցները և ղեկավարները «պլանավորել էին Հայաստանում իրականացնել ահաբեկչական և իշխանությունը զավթելուն ուղղված գործողություններ»: ՔԿ-ից նաև Սրբազանին վերագրվող ձայնագրություններ, ինչպես նաև առգրավված զենք-զինամթերքի՝ հիմնականում որսորդական հրացանների լուսանկարներ հրապարակվեցին, որոնցով պետք է իրականացվեր ենթադրյալ «ահաբեկչությունը»։

Oragir.News-ի տեղեկություններով՝ հայտնաբերված զենք-զինամթերքի ճնշող մեծամասնությունը եղել է օրինական։

Օրինական են եղել լուսանկարներում առկա դիպուկահար, ակուսափող և հարթափող զենքերը։ Օրինական, ընդ որում կրակված են եղել նաև հրապարակված փամփուշտները․ օրինականությունն ապացուցում են դրանց վրայի գրությունները, իսկ կրակված լինելն ակնհայտ է դառնում շատ պարզ գործողության՝ նկարները մոտեցնելու արդյունքում։ Բացի այդ, փաստում են, որ զենքերը որսորդական նշանակության էին։

Միևնույն ժամանակ օրինական են եղել նաև առգրավված բարութը և փամփուշտի լիցքավորիչները։ Վերջիններս ևս քաղաքացիական նշանակության են։

Ուշագրավ է, որ սխալմամբ կամ պարզապես փնթի աշխատանքի հետևանքով լուսանկարներում երևում էին նաև ձերբակալված անձանց որսորդական գրքույկները ու զենքի լիցենզիաները։

Այսպիսով՝ իրավապահները «Սրբազան պայքար»-ի կողմնակիցներին փաստացի մեղադրում են որսորդական զենքով և կրակած փամփուշտներով ահաբեկչություն իրականցնելու մեջ, իսկ հրապարակված զենք-զինամթերքը վերջիններիս է պատկանել առնվազն տևական ժամանակ։