«Հեղաշրջման փորձի» մասին խոսելը՝ սեփական անձն ինչ-որ մի տեղ զոհի կերպարի մեջ ներկայացնելու փորձ է. Ձյունիկ Աղաջանյան

«Եկեղեցու դեմ պայքարն այս իշխանությունների նախաձեռնությունը չէ, ընդհանուր ծրագրի մաս է կազմում»,- «Հայ Առաքելական եկեղեցի, պետականություն և արտաքին քաղաքականություն» համաժողովի ընթացքում ասաց արտակարգ և լիազոր դեսպան Ձյունիկ Աղաջանյանը՝ պատասխանելով Panorama.am-ի հարցին, թե ի՞նչ նպատակով է իշխանությունն արշավ սկսել Հայ Առաքելական եկեղեցու դեմ։

Ըստ նրա, գունավոր հեղափոխությունների սցենարներով ազգի, պետության  հենասյունային կառույցների հանդեպ, հատկապես եթե  կրոնական բովանդակություն ունեն, մեծ արշավ է սկսվում, դրա նպատակը դիմադրողականությունը, առանցքային հենասյուներն ոչնչացնելն է։

«Մեր պարագայում եկեղեցին մեր ինքնության մասն է,  հազարամյակների ընթացքում առաջատարն է եղել մեր ազգային դիմադրողականության ձևավորման, դրա անխաթար առաջ մղման, փաստացիոներն, նաև դա տեսնում ենք Սփյուռքում, չձուլման քաղաքականության։

Բնականաբար, այս իշխանությունները, որոնք  սպասարկում են  արևմտյան հեռահար նպատակներով ձևավորված թուրք-ադրբեջանական ծրագիրը, նրանց համար հենասյուն, առանցքային կառույց, որը կարող է խաթարել իրենց ծրագրերի իրականացմանը, որպես հակառակորդ, թշնամի են ընկալում։

Այս արշավն ունի հստակ նպատակ՝ ուղղված է ազգի ինքնության ոչնչացմանն, դիմադրողականության ջախջախմանը»։

Խոսելով եկեղեցու դեմ արշավում իշխանության կիրառած բառամթերքի մասին, ըստ Ձ. Աղաջանյանի, նման խմբակի կողմից  նման  բառնամթերքի օգտագործումը, բնական է, դա իրենց էությանն է։

«Ժողովուրդը տեսնում է, թե իրականում ում է  հավատացել իր ազնիվ մղումներից դրդված, ում է  բերել, ձայն տվել, նստացրել իր գլխին, որը ազգի, պետության համար աղետաբեր է, նաև իր էության մեջ ոչնչություն է»,- ասաց Ձ.Աղաջանյանը։

Ինչ վերաբերում է իրավապահների այսօրվա գործողություններին՝ «հեղաշրջման փորձ», ընդդիմադիրների բնակարանների խուզարկություններ, ձերբակալություններ, դիվանագետն ասաց. «Գունավոր  հեղափոխությունների սցենարի անբաժան մասն է նաև նահատակ ներկայացնելը։ Սեփական անձն ինչ-որ մի տեղ զոհի կերպարի մեջ ներկայացնելու փորձ է։ Բնականաբար, չի հաջողի»։

Մանրամասն՝ տեսանյութում։ 
Աղբյուրը` Panorama.am