Արցախի մասին խոսելը մեզ համար կամաց-կամաց դառնում է տաբու. Նաթան Սրբազան

«Գոյություն ունի միջկրոնական և միջեկեղեցական դիվանագիտություն, որտեղ գործածվում է բանակցության և խոսքի ուժը, որտեղ կա բանակցություն, այնտեղ պետք է լինի դիվանագիտություն»,- «Հայ Առաքելական եկեղեցի, պետականաշինություն և արտաքին քաղաքականություն» թեմայով համաժողովին ասաց Մայր Աթոռի Արտաքին հարաբերությունների և արարողակարգի բաժնի տնօրեն Տ. Նաթան արքեպիսկոպոս Հովհաննիսյանը։

Սրբազանի խոսքով, այդ դիվանագիտությունը կարևոր համադրություն է, որը միավորում է կրոնական, մշակութային և աշխարհաքաղաքական տարերրը միասին. «Այս դիվանագիտության միջոցով է, որ Հայաստանյայց Առաքելական եկեղեցին բավական ակտիվ դեր է խաղում Հայաստանի արտաքին քաղաքականության մեջ, ինչպես նաև միջազգային տարբեր հարցերի լուծման վրա որոշակի ազդցություն ունենալով»։

Սրբազանը նշեց, որ Հայ Առաքելական եկեղեցին ոչ միայն կրոնական հարցերով է զբաղվում, այլ նաև կատարում է  որոշակի դիվանագիտական աշխատանք, որն ուղղված է ՀՀ-ի արտաքին շահերի պաշտպանությանը, կարևոր կապող օղակ է հանդիսանում ՀՀ-ում և սփյուռքում, նաև միջազգային իմիջի ամրապնդման դեր ունի։

Նաթան Սրբազանի խոսքով, Հայ Առաքելական եկեղեցին հատկապես Արցախյան հարցի շուրջ դիվանագիտական բավական մեծ գործ է կատարել բոլոր ատյաններում։

«Այս շրջանում Արցախի հարցը շատ զգայուն է  դարձել ինչպես Ադրբեջանում, այնպես էլ Հայաստանում։ Նույն կերպ ռեակցիաներ կան երկու կողմից։ Օրինակ, մայիսին Բեռնում կայացած համաժողովը շատ լուրջ ռեակցիա առաջացրեց ադրբեջանական կողմում, նույն ռեակցիան երևի առաջացրեց Հայաստանում։ Չգիտեմ ինչու՝ Արցախի մասին խոսելը կամաց-կամաց դառնում է տաբու մեզ համար, արգելված ու վնասակար մի բան»,- ասաց Սրբազանը։ 
Աղբյուրը` Panorama.am