Սամվել Կարապետյանի դեմ այս քայլը Նիկոլ Փաշինյանի քաղաքական ինքնասպանության սկիզբն է լինելու

Թուրքիա մեկնելուց առաջ, Նիկոլ Փաշինյանը պետք է հավաստիացներ Էրդողանին, որ Հայ Առաքելական եկեղեցու կազմաքանդման հարցում իր խոստումը մինչև վերջ կատարելու է:
Իրանա-իսրայելական այս պատերազմը փոքր-ինչ շեղեց հանրային ուշադրությունը, սակայն Սամվել Կարապետյանի հանդեպ այս աղաղակող ապօրինությունն անհրաժեշտ էր Նիկոլ Փաշինյանին որպես ապացույց, որ ինքը Էրդողանի հանձնարարած տնային աշխատանքը լավ է կատարում:
Ըստ էության, սա նշանակում է, որ Փաշինյանը գնում է վա-բանկ. մինչև ընտրությունները փորձում է կազմաքանդել Հայ Առաքելական եկեղեցին, որպեսզի Էրդողանի ձեռքից ստանա իր ցանկացած «խաղաղության պայմանագրի» թուղթը: Այն «թուղթը», որով նա կարծում է, թե կկարողանա հերթական անգամ խաբել հայ հասարակության մի հատվածին՝ փորձելով կրկին վերարտադրվել 2026թ. գալիք ընտրություններին:
Սակայն հաշվի առնելով այդ «թղթի» տակ եղած պայմանները՝ հայ հանրության ճնշող մեծամասնությունն արդեն հասկացել է, որ սա ոչ այնքան գրոհ էր Եկեղեցու և Վեհափառի դեմ, որքան՝ գրոհ է Հայոց պետականության դեմ: Փաշինյանը պատրաստվում է Հայաստանը դարձնել «Արևմտյան Ադրբեջան», որպեսզի կարողանա հետագայում խուսափել պատասխանատվությունից: Քանզի, եթե չկա հայկական պետականություն, ուրեմն՝ չի լինի նաև Փաշինյանի պատասխանատվության հարցը:

Սակայն նրա այս քայլը անպատասխան չի մնալու, քանի որ սա Արցախը պարտության մատնելու հարց չէ, սա «Կիրանցի հարց» չէ, որոնց պատճառով սկսված շարժումները հաջողության չհասան: Սա արդեն Հայաստանի լինել-չլինելու հարց է:
Եվ ուրեմն՝ այս անգամ սկսվելիք նոր համազգային շարժումն անխուսափելիորեն հասնելու է հաջողության:
Ըստ էության, մենք միշտ կողմ ենք եղել, որ իշխանությունը փոխվեր ընտրությունների միջոցով: Սակայն պարզվում է, որ ինքը՝ Փաշինյանն է դեմ դրան, քանզի շատ լավ հասկանում է, որ առանց պետականության կազմաքանդման, ինքն ընտրություններում հաղթելու ոչ մի շանս չունի: Այդ իսկ պատճառով էլ նա ընտրել է դեստրուկտիվ ճանապարհը: Բայց դա արդեն ոչ թե մեր, այլ ի՛ր ընտրությունն է:
Եվ հետագա գործընթացների արդյունքը նույնպես իր ընտրությունն է:
Սա է իրականությունը:
Դավիթ Մկրտչյան
Zham.am