Այն գործողությունները, որոնք կատարում է Փաշինյանը, դուրս են սահմանադրական կարգից․ սահմանադրագետ

«ՀՀ Սահմանադրությունը հստակ արձանագրել է, որ Եկեղեցին ու պետությունն անջատ են, միաժամանակ, 18-րդ հոդվածով սահմանվում է Առաքելական Սուրբ Եկեղեցու բացառիկ դերը։ Դա նշանակում է, որ հանրային իշխանությունը չպետք է որևէ միջամտություն ցուցաբերի Առաքելական Եկեղեցու գործերին։ Դա վերաբերվում է նաև այլ կրոններին»,- «Պետության և եկեղեցու փոխհարաբերությունները. արդի հիմնախնդիրները» խորագրով» քննարկման սկզբում լրագրողների հետ ճեպազրույցում ասաց․ սահմանադրագետ Վարդան Պողոսյանը՝ անդրադառնալով Եկեղեցու դեմ Նիկոլ Փաշինյանի սկսած արշավին։

«Այն գործողությունները, որոնք կատարում է Փաշինյանը, դուրս են սահմանադրական կարգից, որովհետև նա լիազորված չէ, որպես ՀՀ վարչապետ, միջամտել Հայաստանյաց Առաքելական Սուրբ Եկեղեցու ներքին ինքնավարությանը, գործերին։ Մեր սահմանադրության 41-րդ հոդվածի 4-րդ մասը նաև հստակ սահմանում է, որ կրոնական կազմակերպություններն ունեն ինքնավարություն։ Այսինքն, բոլոր այն հարցերում, որոնք վերաբերում են Հայաստանյաց Առաքելական Սուրբ եկեղեցու ներքին գործերին, իսկ դրա մեջ առաջին հերթին մտնում է նվիրապետությունը, եկեղեցու սպասավորների և պաշտոնատար անձանց նշանակման-ազատման կարգը, այդ բոլոր հարցերը դուրս են պետական որևէ մարմինի հայեցողությունից»,- սաց սահմանադրագետը։

Մանրամասները Yerevan.today-ի տեսանյութում։