«Դեռևս ձեռնպահ եմ մնում այդ թեմայով խոսելուց. գործընթացը ձախողված չէ՝ վաղուց սկսված է». Սերժ Սարգսյան

Այսօր ՀՀ նախկին վարչապետ, երջանկահիշատակ Անդրանիկ Մարգարյանի ծննդյան օրն է։ Երրորդ  նախագահ Սերժ Սարգսյանի գլխավորությամբ ՀՀԿ-ականներն այցելել են Պանթեոն։

Պանթեոնում Սերժ Սարգսյանը պատասխանել է նաև լրագրողների մի քանի հարցերի, դրանցից մեկը վերաբերում էր 168.am-ի այն հարցին, թե արդյոք իրենք հաշվարկե՞լ էին այն սցենարը, որ հնարավոր է ստեղծվեր այնպիսի իրավիճակ, որ իմպիչմենտի գործընթացին միանալու առնչությամբ «Հայաստան» դաշինքը կսկսի խոսել պայմանների լեզով։ Ի պատասխան՝ Երրորդ նախագահն ասաց.

«Կարծում եմ՝ երեկ Հայկ Մամիջանյանն ամբողջությամբ այդ թեման լուսաբանել է, բացահայտել։ Ես դեռևս ձեռնպահ եմ մնում այդ թեմայով խոսելուց»։

Հաջորդ հարցին, թե՝ Ձեր յուրաքանչյուր հարցազրույցից հետո ոչ միայն ողջ ՔՊ-ականները, այլև նրան հարող, այդպես կոչված, ընդդիմադիրները մի քանի հարցազրույցներ են տալիս, որպեսզի պատասխանեն իրեն, ինչո՞ւ, նախագահ Սերժ Սարգսյանը հարցով պատասխանեց.

«Բայց դա վա՞տ է, կարծում եմ՝ նույնիսկ ձեզ համար է լավ, թեմա է, էլի, գրեք, լուսաբանեք»։

Իմպիչմենտի գործընթացի վերաբերյալ հարցին, թե արդյո՞ք ի սկզբանե այս գործընթացը դատապարտված չէ, որովհետև 36 պատգամավորներ չկան, որոնք կստորագրեն, Սերժ Սարգսյանը պատասխանեց՝ իհարկե դատապարտված չէ։

«Բայց ի՞նչ կապ ունի 36-ը։ Գիտեք՝ ես ինչի՞ց եմ զարմանում, որ լրագրողը, որն այդ թեմայով հետաքրքրվում է, ուշադիր չի հետևում տարբեր մարդկանց բացատրություններին։ Եթե, օրինակ, դուք երեկ լսած լինեիք Հայկ Մամիջանյանին, այդ հարցը չէիք տա։ 36-ն ի՞նչ կապ ունի, մեզ 54 է պետք»,- նշեց Սերժ Սարգսյանը։

Լրագրողի դիտարկմանը, որ 36 ձայն ասելով՝ նկատի ունի իմպիչմենտի գործընթացը սկսելու համար, Երրորդ նախագահը պարզաբանեց.

«Ո՛չ, գործընթացն արդեն սկսված է, վաղուց սկսված է։ Գործընթացը սկսվում է, երբ ԱԺ մեկ պատգամավոր առաջադրում է վարչապետի թեկնածու, գործընթացն այդ ժամանակ է սկսվում։ Մենք ասացինք, որ նիստերի դահլիճ ենք բերելու, երբ ունենանք 54 ձայն, 36-ը կապ չունի, վատ թիվ եք ասում»։

Մանրամասները՝ 168.am-ի տեսանյութում