«Մայր Հայաստանը» նպատակահարմար չի գտնում մասնակցել ՔՊ-ի կողմից առաջարկվող քննիչ հանձնաժողովի աշխատանքներին

«Մայր Հայաստան» խմբակցությունը նպատակահարմար չի գտնում մասնակցել «Քաղաքացիական պայմանագիր» խմբակցության կողմից առաջարկվող քննիչ հանձնաժողովի աշխատանքներին, որոնք առավելապես քաղաքական շոուի համար են կազմակերպվում և նպատակ ունեն քողածածկելու օրվա իշխանությունների չարաշահումները: Այս մասին ասված է «Մայր Հայաստան» խմբակցության ղեկավար Մանուկ Սուքիասյանի հրապարակած փաստաթղթում։

«ՔՊ խմբակցության առաջարկը տեղի ունեցավ այն բանից հետո, երբ մեր խմբակցության կողմից բարձրաձայնվեցին մանկապարտեզների (և ոչ միայն) վերանորոգման կամ քաղաքապետարանի կողմից այլ ուղղությամբ ծախսերի դեպքում առերևույթ կոռուպցիոն ռիսկերի, անարդյունավետ կառավարման, գումարների աննպատակ մսխման մասին։

Եթե «Քաղաքացիական պայմանագիրն» իրոք ցանկանում է ուսումնասիրել Երևան համայնքին պատկանած դպրոցների ու մանկապարտեզների տարածքների օտարման գործընթացները և գնահատել դրանց հետևանքները, ապա որպես իշխող ուժ ունի դրա բոլոր հնարավորությունները համապետական մասշտաբով՝ տիրապետելով ամբողջ իրավապահ համակարգին։ Բացի այդ, Երևանի քաղաքապետարանը տիրապետում է ամբողջական տեղեկատվական բազային և կարող է առանց այդ հանձնաժողովի օգնության ներկայացնել, թե ինչ է տեղի ունեցել նշյալ ոլորտներում։ Ընդ որում, այդ ուսումնասիրությունը և հանրությանը մատուցվելիք տեղեկատվությունը պետք է ներառեն ոչ միայն 1996–2018 թվականներին տեղի ունեցածը, ինչպես որ առաջարկում է «Քաղաքացիական պայմանագիրը», այլ նաև հետանկախական ամբողջ ժամանակաշրջանը՝ 2025 թվականը ներառյալ։ Ուսումնասիրությունը պետք է ներառի նաև համայնքապատկան մյուս կրթական, մարզական ու մշակութային օջախների օտարման կամ դրանց վերանորոգման վրա կատարված ֆինանսական հատկացումների պատմությունը, դրանց արդյունավետությունը, կոռուպցիոն ռիսկերը։

Մենք կողմ ենք, որ բոլոր ժամանակների կոռուպցիոներները, անարդյունավետ կառավարիչները և բյուջեն մսխողները՝ ներառյալ ներկա իշխանությունը ներկայացնողները, բացահայտվեն ու պատժվեն օրենքի ամբողջ ուժով»,-ասված է «Մայր Հայաստան»-ի պատասխանում։