Նոր «Թիվ 6 պալատ» կամ՝ «Արդյո՞ք լիզում եմ թուրքի կոշիկները, արդյո՞ք վաճառել եմ Ղարաբաղը, արդյո՞ք ուրանում եմ մեր պատմությունը»․ Փաշինյանի նոր գրառումը

Նիկոլ Փաշինյանը այսօր առավոտյան ֆեյսբուքյան հերթական գրառումն է արել՝ մասնավորապես, նշելով․

«Գարեգին Բ–ն ինքն անձամբ թող պարզաբանի․ արդյո՞ք խախտել է կուսակրոնության ուխտը եւ արդյո՞ք զավակ ունի։

Մենք՝ իր հոտը, իրավունք ունենք իրենից լսելու ճշմարտությունը»։

Նիկոլ Փաշինյանի գրառման ներքո բազմաթիվ օգտատերեր հարցադրումներ են անում, թե արդյո՞ք դա այն խնդիրն է, որով պետք է զբաղվի երկրի կառավարությունը, արդյո՞ք կաթողիկոսի՝ կուսակրոնության ուխտի հնարավոր խախտումն է մեր երկրի համար ավելի վտանգավոր եղելլ, թե՞ Արցախը հանձնելը, 5 հազար զոհ գտալը։

ԱԺ «Հայաստան» խմբակցության պատգամավոր Լևոն Քոչարյանի օգնական Արթուր Սուքոյանը ևս մեկնաբանել է Նիկոլ Փաշինյանի գրառումը՝ նշելով․ «Իմ ընկալմամբ Հայաստանի Հանրապետության վարչապետը հեղինակություն է, սահմանադրության պաշտպան, արդարադատության աղբյուր։

Չեմ կարող հավատալ, որ վարչապետը կարող է ճշմարտություն կոծկողի դերում լինել, չեմ կարող հավատալ, թե Վարչապետի բերանից կարող է հնչել այլ բան, քան ճշմարտությունը։

Նիկոլ Փաշինյանն ինքն անձամբ թող պարզաբանի․ արդյո՞ք խախտել է վարչապետի երդումը եւ արդյո՞ք լիզել է թուրքի կոշիկ:

Մենք՝ ՀՀ քաղաքացիներս, իրավունք ունենք իրենից լսելու ճշմարտությունը»։

Փաշինյանը մեկնաբանել է՝ գրելով, թե այդ և այլ նմանատիպ հարցերի նա պատասխանում է «Կրթվելը նորաձև է» շարժման միջոցառումների ժամանակ։ Այնուհետև մեկ այլ գրառում է արել․

«Սիրելի հայրենակիցներ, «Կրթվելը նորաձեւ է» շարժման շրջանակներում իմ ունեցած «Իմանալ ինչպես» եւ «Իրական Հայաստանի գաղափարախոսությունը» բանախոսությունների շարքում ես անդրադառնում եւ պատասխանում եմ բոլոր հնարավոր հարցերին, սկսած նրանից, թե արդյոք լիզում եմ թուրքի կոշիկները, շարունակած նրանով, թե արդյոք վաճառել եմ Ղարաբաղը, արդյոք ուրանում եմ մեր պատմությունը, մեր ինքնությունը թրքացնելու հանձնարարությու՞ն եմ ստացել արդյոք Ձեզ հայտնի կենտրոններից, կամ պարզապես առանց որեւէ մեկի հանձնարարության ուրանում ու նենգափոխու՞մ եմ մեր ինքնությունը։ Եւ այլն, եւ այլն, եւ այլն։

Համացանցում նման հարցադրումներ անող եւ նման համոզմունք հայտնող բոլոր օգտատերերին հրավիրում եմ մասնակցելու «Կրթվելը նորաձեւ է» շարժման հանդիպումներին։ Գրանցվեք, մասնակցեք։ Համոզված եմ, Դուք կստանաք Ձեզ հուզող բոլոր հարցերի պատասխանները։ Հարգանքներիս հավաստիքը եւ մինչ հանդիպում»։