Քաղաքապետարանը խոստովանում է որ տրանսպորտում ուղեվարձի բոյկոտը մոտ է 50 տոկոսի սահմանին

Երևանի քաղաքապետի մամուլի քարտուղար Հայկ Կոստանյանը փաստացի խոստովանել է, որ բնակչությունը բոյկոտում է իրենց կողմից բարձրացված ուղեվարձը: Այն լեգիտիմ չի համարում, ինչի մասին խոսում են  թվերը:

Այսպես, ըստ նրա, այս տարվա առաջին հինգ ամսվա ընթացքում «Երևանի ավտոբուս» ՓԲԸ-ի, Երևանի մետրոպոլիտենի, նաև «Երևանի էլեկտրատրանսպորտ» ՓԲԸ-ի կողմից, ընդհանուր հաշվով, փաստացի հավաքվել է շուրջ 6 մլրդ 30 մլնդրամ:

Այսինքն, միջինը ամսական հավաքվել է 1 մլրդ 260 միլիոն դրամ:

Եթե այս թիվն էլ բաժանենք 30-ի, ապա կստացվի, որ օրական միջինը հավաքվել է 42 մլն դրամ:

Եթե հաշվի առնենք, որ նշված հինգից չորս ամսվա ժամանակ ուղեվարձը արդեն թանկացել էր և դարձել էր 150 դրամ, ապա կստացվի, որ մոտավորապես օրական միջինը մոտ 300.000 ուղևոր է վճարել, իսկ մյուսները չեն վճարել:

Այսինքն, ստացվում է, որ 600.000-ից, ուղիղ կեսն է վճարել ուղեվարձի համար:Այսինքն, քաղաքապետարանը խոստովանում է, որ բոյկոտը 50 տոկոսով կյանքի է կոչվել, ինչը հերքում էին՝ մինչ այս թվերը հրապարակելը:

Իսկ այս թվերն էլ հրապարակեցին, որպեսզի մունաթ գան Երևանի ընդդիմադիր ավագանիների վրա, որոնց պատճառով չեն կարողացել հավաքել իրենց ուզած թվերը Երևանի իշխանությունները:

Ըստ նրանց, այս պատկերի արդյունքում, Երևանի քաղաքապետարանը նախատեսել և հայտարարել էր, որ ձեռք է բերելու շուրջ 45 տրոլեյբուս: Սակայն, պարզվում է, որ  45-ից առնվազն 30-ը հնարավոր չի լինելու գնել, քանի որ,  թերհավաքագրումները բերել են նրան, որ այդ գումարը, որպես այդպիսին, չկա: Հետևապես այդ 30 նոր տրոլեյբուսները, որ պետք է լիներ 45-ի մեջ, դուրս են եկել ցանկից:

Քաղաքապետարանի ներկայացուցիչները այս քայլով, փորձում են հրամցնել այն տեսակետը, թե իբր քաղաքը չի ստանալու սպասվելիք տրոլեյբուսներն ընդդիմադիրների պատճառով:

Պարզվում է, քաղաքային իշխանությունները նոր ավտոբուսները գնում էին հենց ուղեվարձի բարձրացումը հաշվի առնելով:

Այսինքն, այս իշխանությունները արդեն խոստովանում են, որ իրենց իբր «լավությունը»՝ նոր ավտոբուսների տեսքով, պիտի լիներ, ոչ թե տնտեսության զարգացման շնորհիվ, այլ հենց բնակիչների հաշվին:

Սա մոտավորապես այն է, որ Ա քաղաքացին, որոշի նվեր տալ Բ քաղաքացուն և դրա մասին ամենուր թմբկահարի, բայց հետո նշի, որ այդ նվերը պիտի լինի հենց Բ քաղաքացու հաշվին: Այսինքն՝ նվեր ստացո՛ղը պիտի վճարի այդ նվերի գումարը:

Իսկ մեր քաղաքացիները, կարծում էին, որ 2018-ից հետո երկրում պիտի հաստատվեին աննախադեպ տնտեսական զարգացման տեմպեր և դրա հաշվին, պիտի գնվեին այդ ավտոբուսները երևանցիների համար:

Երբ «Մայր Հայաստանի» ներկայացուցիչները պնդում էին, որ ուղեվարձի ինքնարժեքը առնվազն երկու անգամ ավելի պակաս է, քան 150դրամը, շատերը թերահավատությամբ էին վերաբերվում:

Մինչդեռ, հիմա իշխանությունն է բացեիբաց խոստովանում, որ ուղեվարձի գնի մեջ ներառում է նաև նոր ավտոբուսների արժեքները:

Քաղաքապետարանն իր այս հայտարարությամբ գրեթե խոստովանեց, որ «Մայր Հայաստանի» բոլոր պնդումները իրավացի էին:

Սա է իրականությունը:

Դավիթ Մկրտչյան
Zham.am