Քաղաքապետարանի ներկայացուցիչը փորձում է արդարացնել ապօրինի և անգրագետ թանկացման որոշումները

Այսօր Երևանի քաղաքապետարանի մամուլի խոսնակը հանդես եկավ ասուլիսով՝ փորձելով արդարացնել մի շարք ապօրինի և անգրագետ թանկացման որոշումներ: Ցանկանում եմ անդրադառնալ դրանցից երկուսին։

Կարմիր գծերի գնի ապօրինի բարձրացմում

Քաղաքապետարանի ներկայացուցիչը կրկին պնդում է, թե կայանման վճարի կտրուկ բարձրացումը «արդյունք է տվել», քանի որ իբր կենտրոնը բեռնաթափվել է։ Այս պնդումը բացարձակապես չի համապատասխանում իրականությանը։ Մենք՝ «Մայր Հայաստան» խմբակցությունն, արդեն հաղթել ենք դատարանում՝ ստանալով վճիռ, ըստ որի օրենքով անթույլատրելի է տեղական վճարի գնի բարձրացման հիմնավորում բերել որևէ փողոցի բեռնաթափում։

Ավելին, քաղաքի կենտրոնում երթեւեկությունն ըստ էության չի թեթեւացել, եւ այս կապակցությամբ խոսնակը փորձում է մանիպուլացնել հանրությանը՝ ասելով, թե իբր 2023-ի համեմատ 2024-ին քիչ մարդ է գնել տարեկան փաթեթ, ինչից իբր կարելի է եզրակացնել, որ մարդիկ սկսել են քիչ օգտվել քաղաքի կենտրոնի կայանատեղիներից։ Սա ամբողջապես սխալ է։ Իրականությունը պարզ է՝ գինը 13 անգամ բարձրացել է, և մարդիկ պարզապես ֆինանսապես չեն կարող իրենց թույլ տալ գնել տարեկան փաթեթ, ուստի անցել են ժամավճարով կայանման եղանակին։ Երբ նա հայտարարում է, թե իբր մինչև թանկացումը տարեկան փաթետների գնման տվերը «տասնյակ ամգամներ» ավելի մեծ էին, քան հիմա, դա ակնհայտ կեղծիք է։ Թվերը ստույգ են՝ 2023-ին տարեկան փաթեթ գնել է մոտ 40,000 մարդ, իսկ 2024-ին՝ ընդամենը 8,000։ 40,000-ի մեջ քանի՞ տասնյակ 8,000 կա: Այս թվերը վկայում են ոչ թե կենտրոնի թեթեւացման, այլ քաղաքացիների սոցիալական ծանր վիճակի եւ քաղաքապետարանի սխալ և ապիկար քաղաքականության մասին:

Ավինյանի անձնակազմից նաև հաճախ լսում ենք այն մասին, որ դատարանի վճիռը դեռ ուժի մեջ չէ, քանի որ իրենք բողոքարկել են այն:

Բայց նրամք «մոռանում են» նշել մի «մանրուք»՝ նրանք արդեն երեք անգամ բողոքարկել են, և բոլոր երեք դեպքերում բողոքները վերադարձվել են՝ տեխնիկական սխալների հիմքով։ Շատերը կարող են մտածել, որ սա կոմպետենտության բացակայության արդյունք է։ Բայց ոչ։ Նրանք սա գիտակցված են անում, քանի որ գիտեն՝ բովանդակային առումով իրենց դիրքերը օրենքի առջեւ մեղմ ասած թույլ են, իսկ երբ բողոքը ներկայացվում է տեխնիկապես սխալ, դատարանը չի անցնում բովանդակության քննարկմանը, վերջնական վճիռ չի տալիս և պարզապես վերադարձնում է այն, շտկելուց հետո կրկին մուտք անելու հնարավորությամբ:

Այս մեթոդով նրանք ձգձգում են իրենց խայտառակ պարտությունը, որը մեր օրինական պայքարի հետևանքն է։

Հասարակությանը պատժելու քաղաքականություն՝ տրանսպորտի ոլորտում

Նույն մամուլի խոսնակը բացահայտ սպառնաց հասարակությանը, նշելով, որ իբր «բոյկոտի պատճառով չեն հավաքել նախատեսված գումարները, և դրա հետևանքով չեն կարողանում նոր տրոլեյնուսներ ձեռք բերել»։ Այսինքն՝ նրանք ընդունում են, որ բոյկոտն հաջողվել է, և քաղաքացիների ձայնը հասել է իրենց։

Այստեղ մի պարզ առաջարկ ունենք՝

Վերջ տվեք ապօրինի թանկացումներին, վերադարձեք հին գներին:

Մենք կխոսենք մեր հանրության հետ։

Ինչպես տեսաք, հանրությունը լսում է մեզ։

Կդադարեցնենք դատական գործընթացները։

Դուք չեք ունենա խայտառակ պարտություններ։

Ու ամեն ինչ լավ կլինի։

Հրաժարվեք թալանչիակական քաղաքականությունից։ Դադարեցրեք ամեն ինչի գների աճը։ Ժողովուրդը պատրաստ է վճարել արդարացիի համար։ Հակառակ դեպքում՝ պատրաստ եղեք շարունակական դիմադրության:

Երևանի ավագանու «Մայր Հայաստան» խմբակցության անդամ Սամվել Հակոբյանի ֆեյսբուքյան էջից