Աննա Հակոբյանը թող մանկապիղծների անունները տա, եթե չի տալիս, ուրեմն ինքը հանցագործ է. Աջապահյան
Հայ առաքելական եկեղեցու Շիրակի թեմի առաջնորդ Միքայել արքեպիսկոպոս Աջապահյանը Alpha News-ի հետ զրույցում հրաժարվեց մեկնաբանել վարչապետ Նիկոլ Փաշինյանի՝ հոգևորականներին ուղղված անպարկեշտ գրառումները:
«Ես մեկնաբանելու բան չունեմ, ամեն հիվանդ մարդու ասածը պարտավոր չեմ մեկնաբանել: Խիստ ցավ, ողբերգություն եմ ապրում, որ նման մարդը իմ երկրի վարչապետի պաշտոնն է զբաղեցնում: Տեղի ունեցածն իր հոգեկան վիճակի հետ եմ կապում, սրացումներ են, գարնանային սրացումները վերջացան, հիմա էլ երևի ամառային սրացումներ են»,- ասաց Միքայել արքեպիսկոպոս Աջապահյանը:
Անդրադառնալով Փաշինյանի կնոջ՝ Աննա Հակոբյանի գրառմանը, որում նա հոգևորականներին անվանել է մանկապիղծներ, Շիրակի թեմի առաջնորդն ասաց.
«Եթե Աննա Հակոբյանը գիտի մանկապիղծ հոգևորականի անուն-ազգանուն ու չի ասում, ուրեմն ինքը քրեական հանցագործ է: Իրենով թող զբաղվեն պատկան մարմինները ու եթե այդ պատկան մարմինները մինչև հիմա չեն գնացել այդ կնոջ հետևից, ուրեմն իրենք էլ են հանցագործ: Մանկապղծություն այս երկրում չպետք է լինի, ո՛չ հոգևորական, ո՛չ աշխարհական, ոչ մեկի կողմից: Աննա Հակոբյանը թող անունները տա, եթե չի տալիս, ուրեմն իրեն պետք է տանեն»:
Հետևեք մեզ Facebook-ում