Նիկոլ Փաշինյանը Ազգային ժողովի աթոռին նստած անձի բերանով ադրբեջանցիների «էստի՛ համեցեք» է անում

Քաղաքագետ Դերենիկ Մախասյանը նկատում է. «Ալիևը 5 ամիս առաջ հայտարարել էր, թե շուրջ 300 հազար ադրբեջանցի պաշտոնապես դիմել է Հայաստանի ղեկավարությանը, որպեսզի իրենց վերադարձի, վերաինտեգրման համար պայմաններ ստեղծվեն: Միաժամանակ նշելով, որ Հայաստանի իշխանություններից պատասխան չեն ստացել։ Ըստ էության, հիմա ԱԺ նախագահի աթոռին հայտնված անձի բերանով Նիկոլ Փաշինյանը հիմա է պատասխանում Ալիևին ու 300 հազար ադրբեջանցիների «էստի՛ համեցեք» է անում։

Գրչի մեկ հարվածով գործող իշխանությունները Հայաստանի բնակչության 10 տոկոսից ավելին ադրբեջանցի են դարձնելու։ Սա հղի է քաղաքական հետևանքներով։ Դրանք պատգամավորներ են ունենալու Հայաստանի Ազգային ժողովում։ Քանի որ կոմպակտ բնակեցված են լինելու տարբեր համայնքներում, ուստի տեղական ինքնակառավարման մարմիններում ևս իշխանություն են վերցնելու։ Ադրբեջանցիները սկսելու են ազդել Հայաստանի ներքին ու արտաքին քաղաքականության վրա։ Ադրբեջանը դեմոգրաֆիկ զենք է ունենալու Հայաստանի ներսում։ ՔՊ-ականների խաղաղության պայմանագրին մեկ որակում կարելի է տալ՝ Հայաստանի ադրբեջանականացում ու թրքացում»։