Զինծառայությունից փողով ազատվելու վերաբերյալ աղմկահարույց օրենքի նախագծի քննարկումը չեղարկվեց

ԱԺ Պաշտպանության և անվտանգության հարցերի մշտական հանձնաժողովի այսօրվա արտահերթ նիստը, որտեղ պետք է քննարկվեր զինծառայությունից փողով ազատվելու վերաբերյալ աղմկահարույց օրենքի նախագիծը, չեղարկվեց։ Այս մասին հայտարարեց ԱԺ պաշտպանության և  անվտանգության հարցերի մշտական հանձնաժողովի նախագահի տեղակալ Արմեն Խաչատրյանը։

«Պատճառն այն է, որ հրատապ քննարկման հարցեր կան, որոնք մենք պետք է քննարկենք։ Լրացուցիչ քննարկումներից հետո կդնենք հանձնաժողովի նիստի օրակարգ՝ հաշվի առնելով, որ դեռևս  ժամանակ ունենք»,- ասաց Ա. Խաչատրյանը՝ նշելով, որ այսօրվա նիստը չեղարկվում է, լրացուցիչ կհայտնեն նոր նիստի օրը։

ԱԺ «Հայաստան» խմբակցության պատգամավոր Գեղամ Մանուկյանն ասաց, որ անհասկանալի է՝ նիստի մեկնարկից երկու րոպես առաջ չեղարկել նիստը, հատկապես որ պաշտպանության նախարարն Ազգային ժողովի շենքում է։

«Մեզ համա խիստ անհասկանալի է , նաև հասկանալի է, որովհետև իշխանության համար պարզ էր, որ այսօրվա քվեարկության արդյունքում հանձնաժողովում ձայները բաշխվում էին այնպես, որ  հանձնաժողովը տալու է  բացասական եզրակացություն։ Հասկանալի էր, որ հանրային մեծ ընդզվում կա, տարբեր հասարակական, քաղաքական, հանրային գործիչներ, ընդհուպ մինչև ՄԻՊ-ը, տվել են իրենց բացասական եզրակցությունը։

 Ամեն դեպքում մենք հետամուտ ենք լինելու  այդ հարցն ընդմիշտ Հայաստանի Հանրապետության օրակարգից դուրս բերելու համար։ Հայաստանի Զինված ուժերը բոլորինն են, բոլորը պարտավոր են ծառայել Հայաստանի Զինված ուժերում, պետական մարմինները պարտավոր են կոռուպցիան արմատախիլ անել, եթե ասում են կառուպցիա կա, բայց բոլորը հայրենիքի նկատմամբ ունեն նույն պարտականություններն անկախ սոցիալական, ռասսահական, այլ կատերոգրիաներից»,- ասաց Գ.Մանուկյանը։

Նշենք, որ նախագիծը ներկայացրել է ՔՊ խմբակցության պատգամավոր Հայկ Սարգսյանը։  Նրա ներայացրած նախագծի համաձայն, 

ՔՊ խմբակցության պատգամավորի կողմից առաջարկվող փոփոխությամբ, ժամկետային զինծառայողները կարող են ընտրել հետևյալ երեք տարբերակներից որևէ մեկը․ ծառայել 24 ամիս և ստանալ բարձր դրամական ապահովություն պետության կողմից, ծառայել 6 ամիս և պետբյուջե վճարել 15 միլիոն դրամ, ծառայել 1 ամիս և պետբյուջե վճարել 20 միլիոն դրամ։ 

Աղբյուրը` Panorama.am