Էռնա Ռեւազովայի «Սարերը» հիմա էլ Ավինյանի կարգադրությամբ է փող ստացել. «Հրապարակ»

«Հրապարակը» գրել է. «Քաղաքային տնտեսության հարցերը «հորով-մորով» անելուց հետո Տիգրան Ավինյանը հիմա էլ մշակույթ է «զարգացնում»: Մայիսի 16-ին նա կարգադրություն է ստորագրել «Սարեր» մշակութային ՀԿ-ին 4 մլն 370 հազար դրամ հատկացնելու վերաբերյալ: Նվիրատվությունն արվում է Երեւանի բյուջեից, բայց երեւանցիներին չի բացատրվել, թե ինչու, որ արժանիքների համար է «Սարեր» ՀԿ-ն ստանում նվիրատվություն Ավինյանից եւ ոչ միայն Ավինյանից: ՔՊ-ականների շրջանում կարծես ներքին համաձայնություն կա՝ չթողնել, որ այս ՀԿ-ի ֆինանսական վիճակը վատթարանա: «Սարերը» պարբերաբար միլիոնավոր դրամներ է ստանում պետական տարբեր կառույցներից: Կազմակերպությունը գրանցվել է իշխանափոխությունից հետո՝ 2019 թվականին, եւ նպատակ է հռչակել «հայ ժողովրդի հարուստ ժառանգության նորովի ներկայացումը»: 

Ըստ պետգնումների ռեգիստրի, այն 2022 թվականին երկու գրանտային պայմանագիր է ունեցել ԿԳՄՍ նախարարության հետ՝ մոտ 4 մլն-ի եւ մոտ 30 մլն-ի: Մեկով «Սարերը» «Խոսող կտավներ» ծրագիրն է իրականացրել, երկրորդով «Սամմիթ» անհաջող անվանմամբ միջազգային փառատոնն է կազմակերպել: 
2024 թվականին «Սարերը» 6 անգամ է փող ստացել պետությունից՝ 7 միլիոն, 15 միլիոն՝ պարի միջազգային փառատոնի համար, 5 միլիոն դրամ՝ ««Սասունցի Դավիթ» դաշնամուրային տեսագրվող համերգ» ծրագրով եւ այլն:

Կարելի էր ենթադրել, թե ինչ-որ աստղային դեմք է «Սարերի» նախագահը, որին հաջողվում է այսքան փող ստանալ, բայց նրա անունը՝ Էռնա Ռեւազովա, մեզ ոչինչ չասաց, բացի այն, որ նա Հանրային խորհրդի անդամ է: Ի՞նչ է նշանակում՝ նորովի ներկայացնել, եւ ինչո՞ւ եք այսքան հաճախ գումարներ ստանում, որովհետեւ արժանի մրցակիցներ չունե՞ք: Էռնա Ռեւազովան հիվանդագին ընդունեց մեր հետաքրքրասիրությունը, պատասխանեց մեր հարցերին, սակայն չցանկացավ, որ իր տված պատասխանները հրապարակվեն, քանի որ նա պատասխանում է միայն «նորմալ զապրոսներին», որոնք իրեն են ուղարկվում «մեյլով»: Գուցե պատճառն այն է, որ հայերենին վա՞տ է տիրապետում: 

Ինչեւէ, կարճ զրույցի ընթացքում պարզեցինք, որ Ռեւազովան՝ իր կարծիքով, չունի Հայաստանում մրցակիցներ, որ իր միջոցառումները շատ բարձր մակարդակի են, նաեւ դեմ է այն պնդմանը, թե իրենք շատ նվիրատվություններ են ստանում պետությունից, քանի որ անցյալ տարի նա 6 հայտ է ներկայացրել եւ մերժվել է: Ինչո՞ւ է Ավինյանն իր կազմակերպությանը գումար նվիրել, «Սարերի» ղեկավարը ցանկացավ գաղտնի պահել` գոնե մինչեւ պրեզենտացիան: Մեր տեղեկություններով, խոսքը նոր գրքի հրատարակության մասին է»: