Վրաստանի վարչապետը բաց նամակ է գրել Թրամփին և Վենսին

Վրաստանի վարչապետ Իրակլի Կոբախիձեն ԱՄՆ նախագահ Դոնալդ Թրամփին և փոխնախագահ Ջեյ Դի Վենսին հղած բաց նամակում տարակուսանք է հայտնել ամերիկյան կողմի լռության համար վրաց-ամերիկյան հարաբերությունների վերալիցքավորման և ռազմավարական գործընկերության վերականգնման առնչությամբ։

Վարչապետը նամակը հրապարակել է սոցցանցի իր էջում։ Դրանում Կոբախիձեն նշել է, որ մի քանի շաբաթ առաջ արդեն դիմել էր ամերիկյան ղեկավարությանը երկկողմ հարաբերությունների հարցով, իսկ դրանից առաջ քանիցս մաքուր էջից և կոնկրետ պլանով դրանց վերալիցքավորման պատրաստակամություն է հայտնել, սակայն պատասխան չի ստացել։ Բացի այդ, Վրաստանի վարչապետի խոսքով, երկու երկրների ղեկավարների միջև մինչ այժմ «բարձրամակարդակ ոչ մի շփում չի եղել»։

«Այդ լռությունը զարմանք է առաջացնում վրաց ժողովրդի և իշխանությունների շրջանում մի քանի պատճառներով. նախ՝ Վրաստանն արդեն երկար տարիներ ԱՄՆ ամենահուսալի գործընկերն է մեր ամենաբարդ տարածաշրջանում, որը ռազմավարական նշանակություն ունի Միացյալ Նահանգների համար։ Վրաստանն ԱՄՆ-ին աջակցել է ամենաթեժ կետերում, ներառյալ Իրաքն ու Աֆղանստանը, որտեղ Վրաստանը ներկայացված էր զինվորների ամենամեծ քանակությամբ բնակչության մեկ հոգու հաշվարկով։ Միայն այդ երկու առաքելություններին մասնակցության շնորհիվ մեր փոքր երկիրը խնայել է ԱՄՆ-ի համար 2,5 մլրդ դոլար, ինչը մի քանի անգամ գերազանցում է իրական օգնությունը, որը ցուցաբերվել է Վրաստանին»,- նշվել է նամակում։