Ես երկար չեմ սպասելու, ինձ հետաքրքիր է՝ ո՞վ և ի՞նչ դրդապատճառով է կանգնած պատվերի ետևում. Գևորգ Ստեփանյան

Մայիսի 6-ին Երևանի ավագանու «Մայր Հայաստան» խմբակցության անդամ Գևորգ Ստեփանյանը հայտնեց, որ այրել են իր ընտանիքին պատկանող ավտոմեքենան: Հարուցված քրեական գործից պարզ է դարձել, որ մեքենան այրել է Թաիրովի բնակիչ Արմեն Հարուլյունյանը:

«Ես նույնպես լրատվականներից և ՆԳՆ հայտարարություններից եմ ծանոթացել, որ կա արդեն կալանավորված, Թաիրով քաղաքի բնակիչը կամ բնակիչները, չգիտեմ: Ես ընդհանրապես ո’չ ճանաչում եմ, ո’չ գիտեմ ովքեր են: Ինձ ընդհանրապես հետաքրքիր չէ նրանց ով լինելը, ինձ հետաքրքիր է դրդապատճառը»,-նշեց Գևորգ Ստեփանյանը և հավելեց, որ առաջին իսկ օրվանից էլ դրդապատճառը համարել է իր քաղաքական հայացքներն ու, ամենակարևորը, քաղաքային իշխանությունների կոռուպցիոն սխեմաների բացահայտումները:

ArmLur.am-ի զրուցակիցը նշում է, որ վերջին ժամանակահատվածում անդրադարձել է բոլոր 12 վարչական շրջաններին: Վերջին անդրադարձը եղել է Շենգավիթ վարչական շրջանի Ներքին Շենգավիթ փողոցներին, որտեղ, ինչպես Ստեփանյանն է հայտնում, անդրադարձել է 1 տարի առաջ դուրս գրված միլիոնավոր գումարներին, որոնք ուղղված էին փոսալցմանն ու ասֆալտապատմանը:

«Որևէ մեկի հետ անձնական խնդիրներ ու թշնամանք չեմ ունեցել»,-ասում է Ստեփանյանը և հավելում․ «Սա քաղաքական քայլ է, որն աչք վախեցնելու համար են անում»:

ArmLur.am-ի զրուցակիցը համոզված է, որ այս արարքը վախեցնելու միտում ունի և իրենց գործողությունները կանգնեցնելու, սակայն, ինչպես Ստեփանյանն է նշում, նրանք բացահայտելու են ամեն սխեմա, որտեղ կոռուպցիա է իրականացվում:

«Կալանավորված անձանց չեմ ճանաչում, որևէ առնչություն չեմ ունեցել նրանց հետ: Ովքեր էլ որ լինեն նրանք, ուղղակի, օգտագործվող են, միջոց, որով արվեց գործողությունը: Ինձ հետաքրքիր է, թե ովքեր են կանգնած այս գործողության ետևում և ինչ դրդապատճառով»,-նշեց Ստեփանյանը:

Հարցին, թե Երևանի ավագանու անդամը հույս ունի, որ կբացահայտվի գործողության ստվերում կանգնած անձանց ինքնությունը և կտրվի համապատասխան պատիժ՝ Ստեփանյանը նշեց. «Հույսը վերջինն է մեռնում, բայց ես երկար չեմ սպասելու»: