Նոր դավադիր հարձակում մեր բանակի ու ազգային գաղափարի դեմ

Այսօր իշխող կուսակցության պատգամավոր Հայկ Սարգսյանը հերթական անգամ խոսեց «բանակային բարեփոխումների» մասին։ Ըստ նրա՝ պատրաստվում են կրճատել պարտադիր զինվորական ծառայության տևողությունը և ստեղծել այնպիսի մեխանիզմներ, որոնցով հարուստների երեխաները կկարողանան փոխհատուցում վճարելով չծառայել բանակում։

Սա ոչ թե բարեփոխում է, այլ պետական և ազգային հիմքերի բացահայտ ապամոնտաժում։ Սա ուղղակի սոցիալական խտրականություն է՝ պետության հովանու ներքո։ Վերջում միայն աղքատների երեխաներն են ծառայելու, միայն գյուղերի ու աշխատավորների զավակները կկանգնեն սահմանին։

Երկրորդ, սա կնշանակի, որ սրանց պահած բանակից վախեցած ու հիասթափված հազարավոր ծնողներ ամեն բան կանեն՝ գույք կվաճառեն, վարկեր կվերցնեն, միայն թե իրենց զավակները բանակ չգնան։ Այդպես մենք ծնողների ձեռքով կկերտենք մի սերունդ, որը իր երկիրը պաշտպանել չի ուզելու։ Իսկ ո՞վ պիտի պաշտպանի երկիրը, որտեղ ապրում են իր ծնողները, որտեղ նա ապագա ունի, ընտանիք պիտի կազմի, ապրի ու արարի։

Սկզբում այս գաղափարը կարող է համակրանք առաջացնել՝ «ի՞նչ լավ կառավարություն է, ուզում է մեր երեխաներին փրկել բանակից»։ Բայց հավատացեք՝ սա նույն «ելակների ռազմավարության» երկրորդ փուլն է։

Բայց մեր սահմանները ելակո՛վ չեն պահվում, սահմանը պահում է ՀԱՅ ԶԻՆՎՈՐԸ։ Դու միայն այն ժամանակ ունես Հայրենիք, երբ պատրաստ ես դրա համար արյուն թափել։ Քանի դեռ մենք չենք պաշտպանում մեր սահմանները, ուրիշ ոչ ոք դա մեր փոխարեն չի անելու։

Արդեն իսկ ունենք ահռելի դեմոգրաֆիկ ճգնաժամ և սերնդային բաց բանակում, հատկապես այն բանից հետո, երբ այս դավաճանները ջարդեցին մեր երիտասարդների մի ամբողջ սերունդ։

Յուրաքանչյուր առողջ և մարտունակ հայ երիտասարդ պարտավոր է ծառայել բանակում։ Ո՛չ ուսումը, ո՛չ փողը, ո՛չ կապերը չպետք է պատճառ լինեն բանակից խուսափելու։ Եթե դու հայ ես, առողջ ես ու տղամարդ, ուրեմն պիտի ծառայես։ Դա է պետություն ունենալու միակ ճանապարհը։

Երևանի ավագանու «Մայր Հայաստան» խմբակցության անդամ Սամվել Հակոբյանի ֆեյսբուքյան էջից