Առա՜ջ, «Ինտեր», առա՜ջ, Մխիթարյան. «Ինտերը» 4-3 հաշվով հաղթեց «Բարսելոնային» և անցավ ՉԼ եզրափակիչ

«Մենք պայքարին տվեցին ամեն ինչ։ Մենք հավատացինք մինչև վերջ։ Միասնական՝ որպես մեկ ԹԻՄ։ Մեր երկրպագուների հետ միասին, ովքեր մեզ առաջ էին մղում ամեն վայրկյան։ Սրանք անհավանական զգացողություններ են»,-երեկվա հաղթական հանդիպումից հետո գրել է Հենրիխ Մխիթարյանը։
Հիրավի, Չեմպիոնների լիգայի մրցաշարում «վալիդոլային» կիսաեզրափակիչ հանդիպումներ անցկացրեցին «Ինտերն» ու «Բարսելոնան». ընդհանուր 13 գոլ, բազմաթիվ սուր պահեր, արագ, դինամիկ ֆուտբոլ, գեղեցիկ խաղ, տպավորիչ հնարքներ, հույզեր, մրցավարական սխալներ, բորբոքված երկրպագուներ...
Սա վերջին շրջանում թերևս ամենատպավորիչ ֆուտբոլային դրամաներից մեկն էր: Իսկական «թրիլլեր»:
Ինչպեսև մեկ շաբաթ առաջ, երեկ ուշ գիշեր ևս «Ինտերն» ու «Բարսելոնան» խաղի հիմնական ժամանակը ավարտեցին 3-3 հաշվով: Այս անգամ դա նշանակում էր՝ լրացուցիչ ժամանակ, այսինքն՝ ևս 30 րոպե մրցապայքար: Ըստ որում, առաջին խաղակեսը 2-0 հաշվով հաղթած «Ինտերը» երկրորդ խաղակեսի վերջնամասում արդեն պարտվում էր 2-3 հաշվով: Եվ միայն մրցավարի ավելացրած ժամանակում «հին գվարդիան», ի դեմս պաշտպան Աչերբիի նեչվեց առաջ ու՝ 3-3: 
Լրացուցիչ ժամանակում էլ Ֆրատեզին, ով 80-րդ րոպեին խաղադաշտ էր մտել ևս մեկ հրաշալի հանդիպում անցկացրած մեր Հենրիխ Մխիթարյանի փոխարեն, հաշիվը դարձրեց 4-3, ընդհանուր դիմակայության մեջ՝ 7-6: 
Իսկ դա նշանակում է, որ եզրափակիչ է անցնում մեր Հենրիխ Մխիթարյանի «Ինտերը», որն սպասում է «Արսենալ»-ՊՍԺ զույգի հաղթողին, որը կպարզվի այսօր ուշ երեկոյան: 
«Բարսայի» հայ երկրպագուները, իհարկե, կարող են տխրել, բայց անհնար է չուրախանալ Հենրիխ Մխիթարյանի համար: 
Այո, անկախ ամեն ինչից, մենք ամենից առաջ ուրախ ենք մեր հայրենակցի՝ Հենրիխ Մխիթարյանի համար, որ պահպանում է հրաշալի մարզավիճակ, իր թիմում առաջատարներից մեկն է, հանդես է գալիս բարձր մակարդակով և պատվով է ներկայացնում Հայաստանը:

Լուսանկարները՝ Հենրիխ Մխիթարյանի ֆեյսբուքյան էջից