Ջութակահար Սերգեյ Խաչատրյանը շրջագայությամբ կլինի Սյունիքի մարզում

Վալենսիա, Մոնրեալ, Մոնտե Կառլո,  ... Աշխարհի տարբեր քաղաքներում ու հանրահայտ բեմերում այս տարվա ընթացքում ելույթ է ունենալու հանրահայտ ջութակահար, Հայաստանի վաստակավոր արտիստ Սերգեյ Խաչատրյանը։ Այս տարվա ծրագիրն արդեն հաստատված է։  Իհարկե, հայ հանդիսատեսը նույնպես կարող է լսել Սերգեյ Խաչատրյանի անկրկնելի կատարումները։

Երևանում լրագրողների հետ հանդիպմանը Ս.Խաչատրյանն ասաց, որ Հայաստանի պետական ֆիլհարմոնիկ նվագախմբի հետ այս տարի սեպտեմբերին շրջագայությամբ լինելու է Սյունիքի մարզում։

«Հույս ունեմ՝ այս տարի խոչընդոտներ չեն լինի։ Սեպտեմբերին կլինենք իմ սիրած վայրերում՝ Սյունիքում՝ Մեղրի, Կապան, Գորիս, Սիսիան։ Անցած անգամ Սիսիանում չենք եղել։ Նաև նվագելու ենք Գյումրիում, Երևանում։

Ծրագիրը դեռ չեմ որոշել»,- ասաց ջութակահարը։

Ս. Խաչատրյանը նշեց, որ ցանկանում է բացի համերգներից, հանդիպել երաժշտական դպրոցներ, ուսումնարաններ  հաճախող աշակերտների, երիտասարդների հետ։

«Ես շատ եմ խոսել այստեղ ակադեմիա բացելու մտքի մասին։ Դժվարանում եմ դեռ պատկերացնել, թե ինչպես եմ դա իրականացնելու, բայց հիմա ոնց որ թե ուրվագիծ կա, կարծում եմ մոտ ապագայում կկարողանանք կոնկրետացնել Գերմանիայում պրոֆեսոր իմ ընկերոջ հետ։  

Հայաստանում ունենք մեծ բաց։ Մինչև հիմա էլ գուցե սնվում ենք սովետական ժամանակվա դպրոցից, ստացած աղբյուրից, խնդրն այն է, որ մեր մասնագետները քչանում են, բայց նրանց տեղը չի լրացվում։

Եթե ուզում ենք հասնել միջազգային մակարդակի, պետք է փոփոխություններ արվեն»,- ասաց Ս. Խաչատրյանը։ 

Մանրամասն՝ տեսանյութում։ 
Աղբյուրը` Panorama.am