Քաղաքապետարանն արհամարհում է Վարչական դատարանին և նրա որոշումը

«Հրապարակը» գրում է. «2024 թվականի դեկտեմբերի 24-ին Երեւանի ավագանին ընդունեց տեղական վճարների 2025թ. դրույքաչափերը սահմանելու մասին որոշումը, որով ամբողջությամբ նույնը մնացին 2024-ին շեշտակի թանկացած «կարմիր գծերի»՝ վճարովի ավտոկայանատեղիների դրույքաչափերը: Այսինքն՝ քաղաքը դարձյալ բաժանվեց երկու գոտու՝ «Ա» եւ «Բ»։ Կարմիր գծերի «Ա» գոտում կայանման մեկ տարվա գինը սահմանվեց 160 հազար դրամ, իսկ «Բ» գոտում՝ 24 հազար։ Նույնն են մնացել նաեւ մեկ ժամվա, շաբաթվա եւ ամսվա համար սահմանված դրույքաչափերը:
Հիշեցնենք, որ ավելի վաղ՝ 2024թ. դեկտեմբերի 19-ին, Վարչական դատարանը` 5 դատավորի կազմով, անվավեր էր ճանաչել Երեւան քաղաքի «կարմիր գծերի» համար սահմանված տեղական վճարին վերաբերող ավագանու որոշման դրույթները: Սակայն անգամ այդ որոշումը չխանգարեց Երեւանի քաղաքապետարանին, որ 2025-ի համար էլ նույն որոշումն ընդունվի ավագանու նիստում:

Մինչդեռ դատարանն արձանագրել էր՝ քաղաքապետարանը որեւէ ձեւով չի ապացուցել, որ վճարը շեշտակի թանկացրել է ծառայությունների որակը բարելավելու նպատակով, իսկ փողոցները բեռնաթափելու պատճառաբանությունն իրավաչափ չէ: Վարչական դատարանի վճռում նաեւ նշված էր, որ տեղական վճարը եւ կոնկրետ դեպքում՝ համայնքային սեփականություն հանդիսացող ընդհանուր օգտագործման փողոցներում եւ հրապարակներում ավտոտրանսպորտային միջոցն ավտոկայանատեղիում կայանելու համար տեղական վճարը համայնքի կողմից մատուցված ծառայության համար անհրաժեշտ ծախսերի չափով փոխհատուցման վճար է, որի դրույքաչափը սահմանում է համայնքի ավագանին: Իսկ դրույքաչափը չի կարող գերազանցել տվյալ ծառայության համար անհրաժեշտ ծախսերին: Երեւանի քաղաքապետարանը չի ներկայացրել անհրաժեշտ ծախսերի բացվածքը եւ չի համոզել դատարանին, որ նման ծախսեր են արվում:

Ավագանու ընդդիմադիր «Մայր Հայաստան» խմբակցությունը կրկին դիմել է դատարան` ավագանու իշխանական ֆրակցիաների` «կարմիր գծերի» հետ կապված՝ այս տարի կայացված որոշման դեմ նույնպես, պահանջելով անվավեր ճանաչել այս որոշումը եւս։ 

«Մայր Հայաստան» խմբակցության անդամ Սամվել Հակոբյանը «Հրապարակ»-ին ասաց, որ փետրվարի 12-ին դատարանը վարույթ է ընդունել իրենց հայցադիմումը, նիստեր տեղի չեն ունեցել՝ հաշվի առնելով նույնաբովանդակ նախորդ հայցի նիստերը․ «Մարտի 28-ին դատարանը պարտավորություն էր դրել Երեւանի քաղաքապետարանի եւ «Փարքինգ սիթի»-ի վրա, որպեսզի նրանք ապացուցողական իրենց փաթեթը ներկայացնեին, որ ապրիլի 14-ին վճիռը հրապարակվեր։ Բայց քանի որ անցած երկու շաբաթվա ընթացքում քաղաքապետարանը որեւէ բան չի ներկայացրել դատարանին, դատարանը որոշել է վճռի կայացումը տեղափոխել մայիս ամիս։ Մենք հո գիտենք, որ մենք հաղթել ենք նախորդ տարվա հայցով, իրենք այդ որոշումը չեն թողել, որ օրենքի ուժ ստանա` անընդհատ բողոքարկում են։ Վերաքննիչ դատարանը վերադարձրել է իրենց բողոքը, այդ «վերադարձնելու» որոշումն էլ բողոքարկել են Վճռաբեկ դատարան։ Այս ամեն ինչն իրենք անում են նրա համար է, որպեսզի իրենց խայտառակվելու օրը հետաձգվի, որ այդ վճիռն օրենքի ուժ չստանա։ Եթե այդ վճիռն օրենքի ուժ ստանա, մարդիկ գնալու են քաղաքապետարանին դատի տան եւ այդ 160 հազարը հետ ստանան»։