Պռոշյանցիները բացեցին ճանապարհը. վաղը կառավարությունում նրանց կընդունեն
Տրանսպորտի թանկացման հետևանքով Պռոշյանի ու Քասախի բնակիչները, որ վաղ առավոտից փակել էին ճանապարհը, քիչ առաջ բացեցին Աշտարակի մայրուղին։
Բողոքի ակցիային մասնակից ուսուցիչը հայտարարեց՝ ոստիկանության գնդապետն իրենց խելամիտ առաջարկ է արել, վաղը չորս հոգու պատրաստ են ընդունել կառավարությունում։
«Մենք կներկայացնենք մեր պահանջները, առաջարկները, հիմնավորումները։ Երևանին է սպասարկելու ավտոբուսը, թող հասնի այստեղ։ Եթե վաղը չընդունեցին մեր առաջարկները, ավելի շատով կհավաքվենք։ Դպրոցի աշակերտներն էլ դպրոց չեն գնա, ծնողները, Երևան գնացողները, այս ճանապարհով աշխատանքի գնացողները, քացախցիների մասին էլ չեմ խոսում»,-ասաց բողոքի ակցիայի մասնակից ուսուցչուհին։
Նա առաջարկեց այս պահին գնալ համայնքի մշակույթի տուն՝ քննարկելու հարցը։
«Իսկ բողոքելն և ճանապարհ փակելը կա ու կա։ Այսօր անձրևին եկել ենք, այսքանով կանգնել ենք, վաղը տաք եղանակին ավելի շատով կլինենք, ինչի՞ մասին է խոսքը»,-ասաց նա։ Մասնակից մեկ այլ տղամարդ էլ հայտարարեց, եթե օրենքով են առաջնորդվում, իրենք այդ շրջանակում էլ առաջարկ ունեն։ Երևան քաղաքն ավարտվում է քիչ այն կողմ, կպահանջեն, որ թիվ 59 երթուղին սպասարկող ավտոբուսը հասնի այդտեղ։
Աղբյուրը` Panorama.am
Հետևեք մեզ Facebook-ում