Խորհրդարանական ընտրություններում «Գյումրվա պատմությունը» չպետք է կրկնվի

Հիմնական եզրակացությունը Գյումրիի ընտրություններից:
Քաղաքագետ Բենիամին Մաթևոսյանն Alpha News-ի եթերում «Վերնագիր» հեղինակային հաղորդման ընթացքում ներկայացրել է թեմայի շուրջ մասնագիտական վերլուծություն, որում մասնավորապես ասվում է.

«Աշխատանքային շաբաթն ավարտվում է, իսկ Մարտուն Գրիգորյանը դեռ «որոշում չի կայացրել»։

Գյումրու ավագանու ընտրությունների արդյունքներով ընդդիմադիր ուժերը՝ Ռուբեն Մխիթարյանի գլխավորած «Իմ հզոր համայնքը» կուսակցությունը և Կարեն Սիմոնյանի գլխավորած «Մայր Հայաստան» կուսակցությունների դաշինքը, մարտի 31-ին հայտարարեցին երկրորդ տեղը զբաղեցրած Վարդան Ղուկասյանին աջակցելու մասին։ Վերջինս մասնակցում էր ընտրություններին Հայաստանի կոմունիստական կուսակցության կողմից։ Սակայն հաղթելու, քաղաքապետ լինելու համար Ղուկասյանին անհրաժեշտ են Մարտուն Գրիգորյանի խմբակցության ձայները։ Դա նրան հնարավորություն կտա շրջանցել իշխող «Քաղաքացիական պայմանագիր» կուսակցության թեկնածու Սարիկ Մինասյանին, դառնալ Գյումրու քաղաքապետ և զրկել «Քաղաքացիական պայմանագիր» կուսակցությանը իշխանությունից երկրի երկրորդ քաղաքում։

Ժամանակն է ամփոփել տեղի ունեցածի և ընթացող գործընթացների միջանկյալ արդյունքները.

1. Ընտրություններին կարելի է և պետք է մասնակցել։ Ընտրություններով հնարավոր է հաղթել Փաշինյանին։

2. Ընտրություններին կարելի է մասնակցել առանձին-առանձին, իսկ միավորվել՝ «ընտրատեղամասերի փակվելուց հետո»։

3. Չի կարելի վստահել բոլոր կուսակցություններին և քաղաքական գործիչներին, նույնիսկ եթե նրանք Փաշինյանին «կապիտուլյանտ» են անվանում։

4․ Հայաստանում կա քաղաքական գործիչների և ուժերի մի ամբողջ շերտ, որոնք առաջնորդվում են հետևյալ սկզբունքով՝ «կամ ես կլինեմ իշխանության, կամ Հայաստանում իշխանություն չի լինի»։

5. Փողոցային պայքարի նախորդ փուլերը չհանգեցրին հայտարարված նպատակին՝ իշխանափոխությանը և ազգային միասնության կառավարության ձևավորմանը, քանզի նույն ուժերը, որոնք այսօր խոչընդոտում են հաղթանակը Գյումրիում, մասնակցելով փողոցային բողոքի ակցիաներին, կրկին առաջնորդվում էին նույն կարգախոսով՝ «կամ մենք կլինենք իշխանություն, կամ Հայաստանում իշխանություն չի լինի»։

6. Փաշինյանին և նրան աջակցող թուրքական,ադրբեջանական և արևմտյան սուբյեկտներին հաղթելու համար ընդդիմադիր ուժերը պետք է կառուցեն նախընտրական պայքարի այնպիսի ռազմավարություն, որ նրանց հնարավորություն տրվի հավաքած ձայների տոկոսով գերազանցել Փաշինյանի և այն ուժերի հավաքական տոկոսին, որոնք այսօր «պահպանում են ՔՊ-ի թիկունքը» Գյումրիում։

Մտածե՛ք այդ մասին․․․»։